ކުޑަކުދިންނާ ގުޅުން ހުރި މައްސަލަތައް ތަހުގީގު ކުރުމުމުގައި ހަރަކާތްތެރިވާން 300 އެއްހައި ފުލުހުންނަށް ތަމްރީނު ޕްރޮގްރާމެއް ހިންގާފައި ވާ ކަމަށް ޗީފް އިންސްޕެކްޓާ އޮފް ޕޮލިސް ރިފްއާން އަހުމަދު އަދި އިންސްޕެކްޓާ އޮފް ޕޮލިސް އަހުމަދު ސަފްވަތު ރައޫފް ވިދާޅުވެއްޖެއެވެ.
އެ ދެ ބޭފުޅުން ވިދާޅުވީ ކުޑަކުދިންނާ ގުޅުން ހުރި މައްސަލަތަކަކީ ހާއްސަ ސަމާލުކަމެއް ދީގެން ފުލުހުން ބަލަމުންދާ މައްސަލަތަކެއް ކަމަށާއި ކުޑަކުދިންނާ ގުޅުން ހުރި މައްސަލަތައް ތަހުގީގު ކުރުމަށް ތަމްރީނު ލިބިފައިވާ ޖުވެނައިލް އޮފިސަރުން އުފައްދާފައިވާ ކަމަށެވެ. އެގޮތުން ސެންސިޓައިޒޭޝަން ޕްރޮގްރާމް ރާއްޖޭގެ އެކި ސަރަހައްދުގައި ހިންގާފައިވާނެ ކަމަށާއި އެ ޕްރޮގްރާމް ތަކުން ފުލުހުންގެ ފްރަންޓް ލައިންގައި މަސައްކަތް ކުރާ އޮފިސަރުންނާއި، އިންވެސްޓިގޭޝަން އޮފިސަރުން ހިމެނޭހެން 300 އެއްހައި ފުލުހުން މިހާތަނަށް އެ ޕްރޮގްރާމު ފުރިހަމަ ކޮށްފައި ވާ ކަމަށެވެ.
އަލަށް އެކުލަވައިލި ކުޑަކުދިންގެ ހައްގުތައް ރައްކާތެރިކުރުމުގެ ގާނޫނާއި، ކުޑަކުދިންގެ އަދުލުގެ ގާނޫނާއެކު ކުޑަކުދިންނާ ގުޅުން ހުރި ތަފާތު މައްސަލަތައް ބަލައި ތަހުގީގު ކުރުމުގައި ފުލުހުންގެ ދައުރު ކުރިއަށް ވުރެ ފުޅާވެ، އިތުރު ފަސޭހަތަކެއް ލިބިފައި ވާކަމުގައި ވެސް ވިދާޅުވިއެވެ. އަދި އެ ގާނޫނުތަކަށް ފުލުހުން އިތުރަށް އަހުލުވެރި ކުރުވުމުގެ މަސައްކަތްވެސް ކުރަމުންދާ ކަމުގައި ވިދާޅުވިއެވެ.
ކުޑަކުދިންނާ ގުޅުން ހުރި މައްސަލަތައް ސޯޝަލް މީޑިއާގައި ހިއްސާ ނުކުރުމަށް ގޮވާލައްވަމުން އެ ދޭފުޅުން ވިދާޅުވީ ސޯޝަލް މީޑިއާގައި ކުއްވެރިޔާގެ މައުލޫމާތު ހިއްސާ ކުރުމުން މައްސަލައިގެ ހެކި ގެއްލޭ ކަމަށާއި ހެއްކަށް ނުފޫޒު ފޯރުވުން ފަދަ ކަންކަން ކުރިމަތިވަމުން ދާ ކަމުގައި ފާހަގަ ކުރެއްވޭ ކަމަށެވެ. އަދި ގިނަދުވަސްވެފައި ހުންނަ މައްސަލަތައް ހުށަހެޅުމުން އެ މައްސަލައެއްގައި އެކަށީގެންވާ ހެކި ނުހުންނަ ކަމަށާއި އެހެންކަމުން ކަމެއް ދިމާވުމުން ވީހާވެސް އަވަހަކަށް ފުލުހުންނަށް ރިޕޯޓު ކުރުމަށް އިލްތިމާސް ކުރެއްވިއެވެ.
އެއީ އޮޅުމެއް، މާލޭގައި ކުޑަކުދިންގެ މައްސަލަ ތަހްގީގުކުރަން ތިބި ފުލުހުންގެ އަދަދު ބަލަން ވެއްޖެއެއްނު ، އެފް ސީ ޕީ އިން އެމީހުންގެ މަސްއޫލިއްޔަތު އެންމެ ރަގަޅަށް އުފުލޭބާ؟