އެއާޕޯޓަށް ފުރަންދިޔަ ޓޫރިސްޓެއްގެ ދަބަހުން ވަޒަންތަކެއް ފެނިއްޖެ

ވެލާނާ އިންޓަނޭޝަނަލް އެއާޕޯޓަށް ފުރަންދިޔަ ޓޫރިސްޓެއްގެ ދަބަހުން ވަޒަންތަކެއް ފެނިއްޖެއެވެ.

ފުލުހުން ބުނީ ޓޫރިސްޓެއްގެ ދަބަހުން ވަޒަންތަކެއް ފެނިފައިވާ މައްސަލަ ހުށަހަޅާފައި ވަނީ މިއަދު ހެނދުނު 09:52 ހާއިރު ކަމަށެވެ.

އެވަޒަންތައް ފެނިފައި ވަނީ އުމުރުން 60 އަހަރުގެ ނެމީބިއާގެ ރައްޔިތެއްގެ ދަބަހުން ކަމަށް ފުލުހުން ބުނެއެވެ. އަދި ވަޒަންތަކާ ގުޅޭ ގޮތުން މައުލޫމާތު ސާފު ކުރުމަށް އެމީހާ އާ ފުލުހުން ސުވާލު ކުރަމުން ކަމަށް ފުލުހުން ވަނީ ބުނެފައެވެ.

ފުލުހުން ބުނީ އެ މައްސަލަ އާ ގުޅިގެން ބަލަން ޖެހޭ ކަންކަން ބަލަމުންދާ ކަމަށެވެ.

އެކަމާ ގުޅޭ އިތުރު ތަފްސީލު ފުލުހުން ދީފައެއް ނުވެއެވެ.

މިދިޔަ މެއި މަހުގެ ހަ ވަނަ ދުވަހުގެ ރޭ، ރައްޔިތުންގެ މަޖިލިހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާ އާ ގުޅިގެން، މާލެ ސަރަހައްދުގެ ސެކުއިރިޓީ ވަރުގަދަކޮށްފައިވާ އިރު، އޭގެ ތެރޭގައި ވެލާނާ އިންޓަނޭޝަނަލް އެއާޕޯޓު ވެސް ހިމެނެއެވެ.