ތަރައްގީވަމުން އަންނަ ގައުމުތަކުގެ ތެރެއިން އޯޒޯން ފަށަލައަށް ގެއްލުންދޭ ކެމިކަލް މާއްދާއެއް ކަމުގައިވާ އެޗްސީއެފްސީ ބޭނުންކުރުން ހުއްޓާލި ފުރަތަމަ ގައުމަކީ ރާއްޖެ ކަމަށް އެންވާރަންމަންޓް މިނިސްޓްރީން ބުނެފިއެވެ.
މިނިސްޓްރީން ބުނީ ހައިޑްރޯ ކުލޯރޯ ފުލޯރޯ ކާބަން (އެޗްސީއެފްސީ) ފޭސް-އައުޓް މެނޭޖްމަންޓް ޕްލޭން، ނުވަތަ ކުރުކޮށް 'އެޗްޕީއެމްޕީ'، އަކީ 2010 ވަނަ އަހަރު އެޗްސީއެފްސީ ގޭސް ދިވެހި ރާއްޖެއިން ނައްތާލުމުގެ ގޮތުން 2010 ގައި ފެށި 10 އަހަރުގެ މަޝްރޫއުއެއް ކަމަށެވެ.
އެމަޝްރޫއު ހިންގާފައިވަނީ މަލްޓިލެޓަރަލް ފަންޑްގެ (އެމްއެލްއެފް) ހިލޭ އެހީ މެދުވެރިކޮށް ކަމަށް މިނިސްޓްރީން ބުނެއެވެ.
މިނިސްޓްރީން ބުނީ 2010 ވަނަ އަހަރު 67 މެޓްރިކް ޓަނުގެ އެޗްސީއެފްސީ ގޭސް ދިވެހިރާއްޖެއަށް އެތެރެކޮށްފައިވާއިރު، 10 އަހަރުގެ މުއްދަތެއް ތެރޭގައި 2020 ވަނަ އަހަރު ދިވެހިރާއްޖެއިން އެޗްސީއެފްސީ ގޭސް އެއްކޮށް ފޭސް އައުޓް ކޮށްފައިވާ ކަމަށެވެ.
މިއީ ޕްރޮޓޮކޯލް އިން ކަނޑައަޅާފައިވާ މުއްދަތަށް ވުރެ 10 އަހަރު ކުރި ކަމަށާއި އަދި ރާއްޖެއަކީ ތަރައްގީވަމުން އަންނަ ގައުމުތަކުގެ ތެރެއިން އެންމެ ފުރަތަމަ އެޗްސީއެފްސީ ފޭސްއައުޓް ކުރި ގައުމު ކަމަށް މިނިސްޓްރީން ބުނެއެވެ.
ރަސްމީ ގޮތެއްގައި އެމަޝްރޫއު ނިންމާލުމަށް، މިމަސައްކަތުގައި މައިގަނޑު ގޮތެއްގައި ރާއްޖެއިން ބޭރުންނާއި ރާއްޖެއިން މަސައްކަތްކުރި ހުރިހާ އޮފީސްތަކާއި ވުޒާރާތަކުގެ އިސްފަރާތްތަކުން ބައިވެރިކޮށްގެން މިއަދު ރަސްމިއްޔާތެއް ބާއްވާފައިވާ ކަމަށް މިނިސްޓްރީން ވަނީ ބުނެއެވެ.
"އަ ކޫލް މޫވް: މޯލްޑިވްސް ކުއިޓްސް އެޗްސީއެފްސީ"ގެ ނަމުގައި ބޭއްވި އެރަސްމިއްޔާތުގައި، އެޗްޕީއެމްޕީ ތަންފީޒުކުރި ގޮތާއި ކާމިޔާބުކަމާއި އެކު ފޭސް-އައުޓް ކުރުމުގައި ގެންގުޅުނު އުސޫލުތަކާއި ބެހޭގޮތުން އެކި ދާއިރާތަކާއި ވުޒާރާތަކުން ވާހަކަ ދައްކަވާފައިވާ ކަމަށް މިނިސްޓްރީން ބުނެއެވެ.
މިރަސްމިއްޔާތުގައި މިނިސްޓާ އާމިނަތު ޝައުނާ ދެއްކެވި ވާހަކަގައި ވިދާޅުވީ ހައިޑްރޯ ފްލޯރޮ ކާބަންސް (އެޗްއެފްސީ) ބޭނުންކުރުން ހުއްޓާލުމުގެ ޕްލޭން އެބަހުރި ކަމަށާއި އޯޒޯން އެކްޓަށް ބަދަލުތަކެއް ގެނައުމުގެ މަސައްކަތް ކުރަމުންދާކަމަށާއި އެބަދަލުތައް ގެނެވުމުން އެ ޕްލޭން ތަންފީޒުކުރުމަށް މަސައްކަތް ކުރެވޭނެ ކަމަށެވެ.
މިނިސްޓާ އިތުރަށް ވިދާޅުވީ، ޓެކްނޯލޮޖިކަލް ގޮތުންނާއި ފައިސާގެ ގޮތުން ލިބެންޖެހޭ ސަޕޯޓް ލިބިއްޖެކަމަށްވާނަމަ، އަމާޒަކީ 2030 ވަނަ އަހަރު އަންނަން ވާ އިރަށް ދިވެހިރާއްޖެއަކީ ކާބަން ނިއުޓްރަލް ގައުމަކަށް ހެދުމަށް ކަމަށެވެ.
ކޮމިޝަނާ ޖެނެރަލް އޮފް ކަސްޓަމްސް، އަބްދުﷲ ޝަރީފް ދެއްކެވި ވާހަކަގައި ވިދާޅުވީ، ރީޖަނަލް ބަނދަރުތައް ހިމެނޭގޮތުގެ މަތީން ރަސްމީ ބަނދަރުތަކުގައި އެޗްސީއެފްސީ މާއްދާތައް ބަލާ ފާސްކުރެވޭނެ ނިޒާމުތަކެއް ގާއިމުކޮށްފައިވާ ކަމަށެވެ.
އެގޮތުން މުދާ ޗެކްކޮށް، ދޫކުރުމުގައި އެޗްސީއެފްސީ ގެ ބާވަތްތައް ލޭބަލް ކުރެވިފާ ހުންނަ ގޮތާއި، އޮޅުވާލުންތައް ދެނެގަނެވޭނެ ގޮތާއި، ޓެސްޓް ކުރެވޭނެ ގޮތްތައް ކަސްޓަމްސްގެ ސަރަހައްދުތަކުގައި ގާއިމުކޮށް ބޭނުންކުރުމުން ދާކަމަށާއި އަދި އެފަދަ ގޭސްތައް ޓެސްޓް ކިޓް ބޭނުންކޮށްގެން ދެނެގަނެވޭނެ ގާބިލުކަމާއި ތައްޔާރީތައް ފުރިހަމައަށް ގާއިމުވެފައި ހުރި ކަމަށް ޝަރީފް ވަނީ ވިދާޅުވެފައެވެ.
