މި ފަހުގެ ތާރީހުގައި ދުނިޔެ ދުށް އެންމެ ވަރުގަދަ ޓެރަރިސްޓުންގެ ލިސްޓުގެ އެންމެ ޖާގަ ހޯދި އަލް-ގައިދާގެ ކުރީގެ ލީޑަރު އުސާމާ ބިން ލާދިންއަކީ ޓެރަރިސްޓެއް ކަމަށް ވިދާޅުވުމަށް، ޕާކިސްތާނުގެ ހާރިޖީ ވަޒީރު، ޝާހް މަހްމޫދު ގުރައިޝީ ފަސްޖެހިވަޑައިގެންފިއެވެ.
މިކަމެއް ހިނގާފައި ވަނީ އަފްގާނިސްތާނުގެ ހަބަރު ޗެނަލަކުން ދެންނެވި ސުވާލަކާ ވިދިގެންނެވެ.
ޕާކިސްތާނުގެ ގާނޫނު ހަދާ މަޖިލީހުގައި ވާހަކަފުޅު ދައްކަވަމުން، އުސާމާ ބިން ލާދިން އަކީ ޝާހީދެއް ކަމަށް، ޕާކިސްތާނުގެ ބޮޑުވަޒީރު އިމްރާން ހާން ސިފަކުރައްވާފައި ވާ އިރު، ހަމަ ހަގީގަތުގައިވެސް ބިން ލާދިން އަކީ ޝަހީދެއް ކަމަށް ގަބޫލު ކުރައްވަންތޯ ހަބަރު ޗެނަލުން ސުވާލު ދެންނެވުމުން، ގުރައިޝީ ވަނީ އެ ސުވާލު ދޫކޮށްލައްވާނީ ކަމަށް ވިދާޅުވެފައެވެ.
އެމެރިކާއިން ހިންގި ވަރުގަދަ އަސްކަރީ އޮޕަރޭޝަނެއްގައި ބިން ލާދިން މަރާލިއިރު، އޭނާ ހުރީ ޕާކިސްތާނުގައެވެ. އޭނާ ހުރި އިމާރާތާއި ޕާކިސްތާނުގެ ޒަމާންވީ އަސްކަރީ އެކަޑަމީއަކާ ދެމެދު އެންމެ މޭލެއްގެ ދުރުމިންވެސް ނުހުންނާނެ ކަމަށް މައުލޫމާތު ލިބެއެވެ.
ކަން މިހެން އޮތް އިރު، ގުރައިޝީ ވަނީ، ވާހަކަތައް، އޭގެ ހަގީގީ މާއިން ބޭރުން މާނަ ކުރުމުގެ އަމަލުތައް، ބައެއް މީޑިއާއިން ހިންގާ ކަމަށް ވިދާޅުވެ، ދިފާއަށް ކުޅުއްވާފައެވެ.
