މައްޗަންގޮޅި ދެކުނު ދާއިރާގެ މަޖިލިސް މެމްބަރު އަހުމަދު ހައިތަމާއި އޭނާގެ އަނބިކަނބަލުންނަށް އިންޒާރުދިން މައްސަލައެއް ފެންމަތިވެއްޖެއެވެ.
މެމްބަރު ހައިތަމް އާއި އަނބިކަނބަލުންނާ ބަޔަކު ދިމާކޮށް އިންޒާރު ދިނީ ހައިތަމް ދިރިއުޅުއްވާ ގެ ކައިރިންނެވެ. އެމީހުން ހައިތަމް އާ ދިމާކޮށްލައިގެން ހައިތަމްގެ ގެއަށް ވަންނަން ވެސް މަސައްކަތްކުރި ކަމުގެ މައުލޫމާތު ލިބެއެވެ.
ފުލުހުންގެ މީޑިއާ އޮފިޝަލް "ދަ ޕްރެސް" އަށް ވިދާޅުވީ މެންބަރު ހައިތަމާއި އަނބިކަނބަލުންނަށް ބަޔަކު ދީމާކޮށްލާ އަޑުގަދަކޮށް އިންޒާރު ދިން މައްސަލައެއް ފުލުހަށް މިއަދު ހުށަހެޅުމުން އެ މައްސަލަ ފުލުހުން އަންނަނީ ތަހުގީގު ކުރަމުން ކަމަށެވެ.
މިފަހަކަށް އައިސް މަޖިލިސް މެމްބަރުންނަށް އިންޒާރުދިނުމާއި ހަމަލާ ދިނުމުގެ މައްސަލަ އަންނަނީ ފެންމަތިވަމުންނެވެ.
މެއި މަހުގެ 6 ވަނަ ދުވަހުގެ ރޭ ވެސް ވަނީ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް އަމާޒުކޮށް ޓެރަރިސްޓް ހަމަލާއެއް، އެމަނިކުފާނު ދިރިއުޅުއްވާ ގެކޮޅު ކައިރިން ދީފައެވެ. މި ހަމަލާގައި އެމަނިކުފާނަށް ލިބުނު ޒަހަމްތަކަށް ފަރުވާ ހޯއްދެއްވުމަށް މިހާރު ހުންނެވީ ޖަރުމަންގައެވެ.
