ހުއްދަ އާ އެކު ބޭރުގައި އުޅޭ ފަރާތްތަކަށްވެސް މިސްކިތްތަކަށް ނުވަދެވޭ ގޮތަށް މިސްކިތައް މިސްކިތްތައް ބަންްދުކޮށް ފެން ކަނޑާލުމަކީ ބަލައިގަނެވޭނެ ކަމެއް ނޫންކަމަށް ޑރ. މުހައްމަދު އިޔާޒު ވިދާޅުވެއްޖެއެވެ. އިޔާޒު ވިދާޅުވީ، ހުއްދަ އާ އެކު ބޭރުގައި އުޅޭ މީހުންނަށް މިސްކިތަށް އަރާ ނަމާދު ކުރުން ބަންދުކޮށްގެން ނުވާނެ ކަމަށެވެ. އަދި ފާހާނާއާއި އިސްކުރުތަކުން ފެން ކަނޑާލުމަކީ އޭގެ އުނދަގޫ ވަރަށް ގިނަ ބަޔަކަށް ކުރާނެ ކަމަކަށް ވާތީ، ދެވަނަ ވިސްނުމަކަށް ވަޑައިގަތުމަށް އޭނާ ވަނީ ރައީސް އިބްރާހިމް މުހައްމަދު ސޯލިހަށް ގޮވާލައްވާފައެވެ.
ޑރ. އިޔާޒުގެ އިތުރުން ޝެއިހް އަލީ ޒައިދްވެސް ވަނީ ކަންބޮޑުވުން ފާޅުކުރައްވާފައެވެ. އޭނާ ވިދާޅުވީ، ދުވަހެއްގެ ކޮޅުންވެސް މިސްކިތްތައް ބަންދުކުރަން ޖެހޭނެ ކަމަށް ހިތްޕުޅަށް ނާރާ ކަމަށެވެ. އަދި ޒަރޫރަތަށްޓަކައި މިސްކިތްތައް ބަންދު ކުރެވިފައި މިވާ ދުވަސްތަކަކީ ވަރަށް ހިތާމަވެރި ދުވަސްތަކެއް ކަމަށެވެ.
ޑރ. އިޔާޒާއި ޝެއިހު ޒައިދުގެ އިތުރުން އަލީ ރަމީޒުވެސް ވަނީ ކަންބޮޑުވުން ފާޅު ކޮށްފައެވެ. އޭނާ ބުނީ މިސްކިތްތަކަށް އެއްވެސް ގޮތަކަށް ނުވަދެވޭގޮތަށް މިހާ ހަރުކަށިކޮށް ބަންދުކުރުމަކީ އެއްގޮތަކަށްވެސް ބަލައިގަނެވޭނެ ކަމެއް ނޫން ކަމަށެވެ. އަދި ގިނަ މީހުން ދިރިއުޅޭ ތަންތަނަކީ ފަސޭހައިން ނަމާދުކުރެވޭ ގޮތައް ހުންނަ ތަންތަން ނޫންކަމަށާ މިސްކިތްތައް ހުުޅުވަން ޖެހޭ ކަމަށެވެ.
ރާއްޖެއިން ފެނިފައިވާ ކޮވިޑްގެ އާ ވޭރިއެންޓާއެކު މާލެ ސަރަހައްދުގައި ކޭސްތައް އިތުރުވެ ހާލަތު ގޯސްވުމުގެ ސަބަބުން މިސްކިތްތައް ވަނީ ބަންދު ކޮށްފައެވެ. އެއީ ރައްކާތެރިކަމުގެ ފިޔަވަޅެއްގެ ގޮތުން ކުރި ކަމެއް ކަމަށް އިސްލާމިކް މިނިސްޓްރީން ބުނެފައި ވާ އިރު، މިހާރު މިސްކިތްތަކަށް އަރާ ވަކި ވަކި މީހުން ޖޫރިމަނާ ކުރާ ކަމުގެ ޝަކުވާ ދަނީ ލިބެމުންނެވެ.
އެ ޝަކުވާތަކާ ގުޅިގެން ފުލުހުން ބުނީ، މިސްކިތަކަށް އަރައިގެން އެއްވެސް މީހަކު ޖޫރިމަނާ ނުކުރާކަމަށެވެ.
"ދަ ޕްރެސް" ގެ ނޫސްވެރިން މިއަދު ބައެއް މިސްކިތްތައް ހިމެނޭ ސަރަހައްދުތައް ބެލި އިރު ބަންގި ދޭ ގަޑިއަށް ބައެއް މީހުން މިސްކިތަށް އަރާފައި ވެއެވެ. ނަމަވެސް އެއްވެސް މީހަކަށް ފުލުހުން ފިޔަވަޅު އެޅިތަން ފެނިފައެއް ނުވެއެވެ.
