ކޮވިޑަށް ޕޮޒިޓިވް ވި 2 މީހަކު ހެލްތް ޕްރޮޓެކްޝަން އޭޖެންސީ (އެޗްޕީއޭ)ގެ ބެލުމުގެ ދަށުން ފެސިލިޓީއަށް ގެންދަނިކޮށް ފިލައިފިއެވެ.
ފުލުހުން ބުނެފައިވަނީ ރޭގެ ވަގުތެއްގައި ފުލުހުންގެ ބެލުމުގެ ދަށަށް ގެންދިޔަ ކޮވިޑަށް ޕޮޒިޓިވް 2 މީހަކު ބަންދުން ދޫކޮށްލުމަށް ފަހު އެޗްޕީއޭގެ ބެލުމުގެ ދަށުން ކޮވިޑް ފެސިލިޓީއަށް ގެންދަނިކޮށް ފިލައިފައިވާ ކަމުގެ މައުލޫމާތު ރޭ ފުލުހުންނަށް ލިބިފައިވާ ކަމަށެވެ. އަދި އެމީހުން ހޯދުމުގެ މަސައްކަތް މިހާރު ކުރަމުން ދާކަމަށްވެސް ފުލުހުން ބުނެއެވެ.
މައުލޫމާތު ލިބިފައި ވާ ގޮތުގައި ފިލި ދެމީހުންނަކީ ފުލުހުންގެ ކަސްޓޯޑިއަލްގައި ތިބި 2 މީހެކެވެ. ނަމަވެސް އެމީހުން ފިލީ ކިހާ ހިސާބަކުން ކަމެއް، ފެސިލިޓީއަށް ގެންދަނިކޮށް ވެހިކަލްގެ ޑްރައިވަރަށް ބިރު ދައްކާފައި ކަމެއް ނުވަތަ ނޫން ކަމެއް ނޭނގެއެވެ.
މުޅި މާލެ ސަރަހައްދުގައި ބާރަށް ކޮވިޑް ފެތުރެމުން ދާއިރު އިއްޔެވެސް ވަނީ ގިނަ އަދަދެއްގެ ބަޔަކު ޕޮޒިޓިވް ވެފައެވެ. މިހާރު އެކްޓިވް ކޭސްގެ އަދަދު ވަނީ 21،000 އަށް އަރާފައެވެ.
