ދުނިޔޭގެ އެންމެ ބޮޑު ގަނޑުފެންގަނޑު (އައިސްބާގް)، ދުނިޔޭގެ ދެކުނު ތަނޑި ނުވަތަ އެންޓާޓިކާގެ ސަތަހައިން ނައްޓައިގެން ގޮސް، ވެޑެލް ގަނޑުގައި ދަތުރު ކުރަމުން އަންނަ ކަމަށް، ޔޫރަޕިއަން ސްޕޭސް އޭޖެންސީއިން ހާމަކޮށްފިއެވެ.
އެ އިދާރާއިން ވަނީ، އޭ-76 ނަން ދީފައިވާ މި ގަނޑުފެންގަނޑުގެ ސެޓެލައިޓް ފޮޓޯތަކެއް އާންމު ކޮށްފައެވެ.
އޭ-76 އައިސްބާގަކީ 4320 އަކަ ކިލޯމީޓަރަށް ފެތުރިފައިވާ، 175 ކިލޯމީޓަރު ދިގު އަދި 25 ކިލޯމީޓަރު ފުޅާ ގަނޑުފެންގަނޑެއް ކަމަށް މައުލޫމާތު ލިބެއެވެ. މިއީ ވިލާތާއި އެމެރިކާގެ ބައެއް ޖަޒީރާ ރަށްތަކަށް ވުރެވެސް ބޮޑު ސަރަހައްދެކެވެ.
މިއީ މިހާތަނަށް ދުނިޔޭގައި އުފެދުނު އެންމެ ބޮޑު ގަނޑުފެންގަނޑެވެ. މިހާރު 2 ވަނާގައި އޮތީ އޭ23އޭ ގެ ނަން ދީފައިވާ ގަނޑުފެންގަނޑެކެވެ. މި ގަނޑުފެންގަނޑުވެސް ދަތުރު ކުރަމުން ދަނީ ވެޑެލް ކަނޑުގައެވެ. މި ގަނޑުފެންގަނޑުގެ ބައެއް ވިރި، އަދި ކުދިކުދި ވެފައި ވާކަމަށް ސައެންސްވެރިން ވަނީ އިންޒާރު ކޮށްފައެވެ.
އޭ-76 އައިސްބާގް އެންމެ ފުރަތަމަ ހޯދީ ބްރިޓިޝް އެންޓާޓިކް ސާވޭއިންނެވެ. އަދި ސެޓެލައިޓް ފޮޓޯ ބޭނުންކޮށްގެން، މިކަން ކަށަވަރު ކޮށްފައި ވަނީ، އެމެރިކާގެ ނޭޝަނަލް އައިސް ސެންޓާއިންނެވެ.
ބެލެވޭ ގޮތުގައި، ވަރަށް އަވަހަށް، މި ގަނޑުފެންގަނޑު 2 ނުވަތަ 3 ބަޔަކަށް ބުރިވާނެ ކަމަށާ، ނަމަވެސް އެއީ މޫސުމީ ނޭދެވޭ ބަދަލުތަކާ ގުޅިފައި ވާ ކަމެއް ނޫން ކަމަށް ޔުނިވާސިޓީ އޮފް ކޮލޮރާޑޯގެ ގްލޭޝިއޮލޮޖިސްޓެއް ކަމަށްވާ ޓެޑް ސްކެމްބޯސް ވަނީ ވިދާޅުވެފައެވެ.
