ޗައިނާގެ ވެރިރަށް ބެއިޖީންގްގައި 2022 ވަނަ އަހަރު ކުރިއަށް ގެންދިއުމަށް ހަމަޖެހިފައިވާ ވިންޓާ އޮލިމްޕިކްސް ކުޅިވަރު މުބާރާތް ބޮއިކޮޓް ކުރުމަށް، އެމެރިކާގެ ގާނޫނު ހަދާ މަޖިލީހުގެ ތިރި ގޭގެ ރައީސާ، ނޭންސީ ޕެލޯސީ ގޮވާލައްވައިފިއެވެ.
ބެއިޖީންގްގައި އޮންނަ ވިންޓާ އޮލިމްޕިކްސް ބޮއިކޮޓް ކުރުމަށް ޕެލޯސީ ގޮވާލެއްވީ، ޗައިނާއިން ހިންގަމުންދާ ލާއިންސާނީ ޖަރީމާތައް ހުއްޖަތަކަށް ހައްދަވައިގެންނެވެ. އަދި މިކަމުގައި ބައިވެރިވުމަކީ، ބައިނަލްއަގުވާމީ ލީޑަރުންގެ އަހުލާގީ ފެންވަރު ދައްކަން އަންގައިދެނިވި ކަމެއްގެ ގޮތުގައިވެސް ޕެލޯސީ ވަނީ ސިފަކުރައްވާފައެވެ.
އޮލިމްޕިކް ކުޅިވަރު މުބާރާތް ބޮއިކޮޓް ކުރަން ގޮވާލެއްވުމުގައި، އެމެރިކާގެ ގާނޫނު ހަދާ މަޖިލީހުގެ މެންބަރުންނަކީ ކުރީގައި އުޅުއްވާ ބައެކެވެ. މެންބަރުން ދަނީ މުބާރާތް ބޮއިކޮޓް ކުރުމަށް ނުވަތަ މުބާރާތް އޮންނަ މާހައުލް ބަދަލު ކުރުމަށް ޑިމާންޑް ކުރަމުންނެވެ.
ޕެލޯސީ ވިދާޅުވީ އޭނާ ގޮވާލައްވަނީ "ޑިޕްލޮމެޓިކް ބޮއިކޮޓް" ކުރުމަކަށް ކަމަށެވެ. މަގުސަދަކީ، ގައުމުތަކުގެ އިސްވެރިން، ޗައިނާއަށް ހާޒިރުވެވަޑައިގެން ޗައިނާއަށް ޝަރަފެއް ނުދިނުން ކަމަށްވެސް ޕެލޯސީ ވިދާޅުވިއެވެ. ގަތުލުއާންމެއް ހިންގަމުން ދާ ތަނަކަށް ގައުމުތަކުގެ އިސްވެރިން ވަޑައިގަތުމަކީ، އެ ލީޑަރުންނާ މެދުވެސް ސުވާލު އުފައްދަނިވި ކަމެއް ކަމަށް ޕެލޯސީ ވިދާޅުވިއެވެ.
ޗައިނާގެ ޝިންޖިއާންގްގައި ދިރިއުޅޭ ވީގޫރު ދަރިކޮޅުގެ މުސްލިމުންނާ ދެކޮޅަށް ޗައިނާގެ ކޮމިއުނިސްޓް ސަރުކާރުން ލައިންސާނީ ޖަރީމާތަކާ ގަތުލުއާންމު ހިންގާ ކަމަށް، ބައިނަލްއަގުވާމީ މުޖުތަމައު އިއްތިފާގުވެއެވެ. ނަމަވެސް، ޗައިނާ ސަރުކާރުން މިކަމަށް އިންކާރު ކުރެއެވެ.
