18 އަހަރުން ދަށުގެ 290 ކުދިން ކޮވިޑަށް ޕޮޒިޓިވްވެ ފަރުވާ ހޯދަމުންދާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިއެވެ.
ކޮވިޑް ބައްޔާ ގުޅިގެން އެންމެ ފަހުގެ މައުލޫމާތު ހިއްސާ ކުރުމަށް އެޗްއީއޯސީން މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން މުހައްމަދު މަބްރޫކް އަޒީޒް ވިދާޅުވީ، ކޮވިޑަށް ޕޮޒިޓިވްވެ ފަރުވާ ހޯދަމުންދާ މީހުންގެ ތެރެއިން 290 ކުޑަކުދިން ފަރުވާ ހޯދަމުން އަންނަ ކަމަށެވެ. އަދި 60 އަހަރުން މަތީގެ 49 މީހުން އެކްޓިވް ކޭސްގެ ތެރޭގައި އެބަ ތިބި ކަމަށެވެ.
ރާއްޖޭގައި މިވަގުތު އެކްޓިވް ކޭސްގެ ގޮތުގައި 11،626 މީހަކު ތިބިއިރު ހޮސްޕިޓަލުގައި އެޑްމިޓްކޮށް ފަރުވާ ދޭ މީހުންގެ އަދަދު ވަނީ 246 އަށް އަރާފައެވެ.
މިއަދު އެކަނިވެސް ރާއްޖެއިން ވަނީ 1501 މީހަކު ކޮވިޑަށް ޕޮޒިޓިވް ވެފައެވެ. ހަަމައެއާއެކު އިއްޔެވެސް ވަނީ 1091 މީހަކު ކޮވިޑަށް ޕޮޒިޓިވް ވެފައެވެ. މި ކޭސްތައް މައްޗަށް ގޮސްފައި ވަނީ މި މަހު ކުރީ ކޮޅު އުޅުނު ބެކްލޮގްއެއްގެ ސަބަބުން ކަމަށް އެޗްޕީއޭއިން ބުނެއެވެ. އަދި 11،000 އިންމަތިން އެކްޓިވް ކޭސް ރިޕޯޓްކޮށްފައެވެ.
މިހާރު ކޮވިޑް ކޭސްތައް އިތުރުވަމުން އަންނަ އިރު ރާއްޖޭގައި އާ ވޭރިއަންޓް އުޅޭ ކަމަށް ލަފާ ކުރެވޭ ކަމަށާއި އެކަން ދެނެގަތުމަށް ދިރާސާ ކުރަމުންދާ ކަމަށް އެޗްޕީއޭއިން ވަނީ ބުނެފައެވެ. އެގޮތުން މާލޭ ސަރަަހައްދުގައި ވެސް ކޭސްތައް އިތުރުވަމުން އަންނަ ކަން ފާހަގަ ކުރެވޭ ކަމަށާއި ފްލޫ ކްލިނިކަށް ދައްކާ މީހުންގެ ތެރެއިން ޕޮޒިޓިވްވާ މިންވަރު ވެސް މައްޗަށް ދާ ކަމަށް އެޗްޕީއޭއިން ބުނެއެވެ.
