މިއަހަރުގެ ރޯދަމަހަށް ސައުދީން ހަދިޔާކުރި ކަދުރާ ހަވާލުނުވާ ފަރާތްތަކުން 06 މެއި ވާ ބުރާސްފަތި ދުވަހުގެ މެންދުރު 12:00 ގެ ކުރިން ކަދުރު ގެންދިއުމަށް މިނިސްޓްރީ އޮފް އިސްލާމިކް އެފެއާޒްއިން އެދެއްޖެއެވެ.
މިނިސްޓްރީން މިއަދު ކުރި އިއުލާނުގައި ވަނީ 1441 ވަނަ އަހަރުގެ ފަގީރުންނާއި މިސްކީނުންގެ ދަފްތަރުގައި ހިމެނިފައިވާ ފަރާތްތަކަށް ކަދުރު ބެހުމަށް ހުޅުވާލި މުއްދަތުގެ ތެރޭގައި ބައެއް ފަރާތްތަކުން ކަދުރު ގެންގޮސްފައި ނުވާ ކަމަށެވެ. އެހެންކަމުން އެ ފަރާތްތަކުން މޭ 06 ވާ ބުރާސްފަތި ދުވަހުގެ މެންދުރު 12:00 ގެ ކުރިން ކަދުރު ނުގެންދާނަމަ ބާކީ ހުރި ކަދުރު ހާއްސަ އެހީއަށް ބޭނުންވާ ފަރާތްތަކަށް، ރަމަޟާން މަސް ނިމުމުގެ ކުރިން ބަހައި ހުސްކޮށްލާނެ ކަމަށްވެސް އެ އިއުލާނުގައި ވެއެވެ.
މިނިސްޓްރީން ކަދުރު ދޫކުރަމުން ގެންދަނީ ކޮންމެ ދުވަހެއްގެވެސް 09:00 ން 12:00 އަށެވެ.
ކޮންމެ އަހަރެއްގެވެސް ރަމަޟާން މަހާ ދިމާކޮށް ސައުދީން އަންނަނީ ރާއްޖެއަށް ކަދުރު ހަދިޔާ ކުރަމުންނެވެ. ސައުދީ ސަރުކާރުން ވަނީ މިއަހަރުވެސް ރާއްޖެއަށް 25 ޓަނުގެ ކަދުރު ހަދިޔާ ކޮށްފައެވެ.
