ކޮރޯނާވައިރަސް ޑިޒީޒް (ކޮވިޑް-19) އިން ރައްކާތެރިވުމުގެ ގޮތުން އަޅާފައިވާ ފިޔަވަޅުތަކަށް ލުއި ދިނުމަކީ، އިންޑިއާއަށް ކުރިމަތިލާން ޖެހިފައިވާ ފަދަ ކާރިސީ ތުފާނަކާ، ހަމަ ކޮންމެ ގައުމަކާ ކުރިމަތި ކުރުވާފާނެ ކަމެއް ކަމަށް، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން އިންޒާރު ކޮށްފިއެވެ.
އިންޑިއާގައި މި ބައްޔަށް ޕޮޒިޓިވްވާ މީހުންނާ، ބަލީގައި މަރުވާ މީހުންގެ އަދަދު، ރެކޯޑް ނަމްބަރުތަކުން އިތުރު ވަމުން އަންނައިރު، މިއީ ބޮޑެތި އެއްވުންތަކުގެ ނަތީޖާ ކަމަށް، ތަޖުރިބާކާރުން ވަނީ އިޝާރާތް ކުރައްވާފައެވެ.
ޑަބްލިއުއެޗްއޯއިން ވިލާތަށް ކަނޑައަޅާފައި ހުންނަވާ އިސްވެރިޔާ ހާންސް ކްލޫގެ ވިދާޅުވީ، ރައްކާތެރިކަމުގެ ފިޔަވަޅުތަކަށް މާ އަވަހަށް ލުއި ދިނުމުގެ ގޯހަކީ، ގައުމުތަކުން ހަދައިގެން ވާނެ ގޯހެއް ނޫން ކަމަށެވެ. ރައްކާތެރިކަމުގެ ގޮތުން އަޅާ ފިޔަވަޅުތަކަށް ލުއި ދިނުމަކީ ބޮޑެތި އެއްވުންތަކަށް މަގު ފަހި ކުރާ ކަމެއް ކަމަށާ، ފަސޭހައިން ފެތުރޭ ވޭރިއަންޓްތައް އުޅެފައި، ވެކްސިން ދެވޭ ރޭޓް ދަށްކޮށް އޮތުމަކީ، ކޮންމެ ގައުމަކަށް މި ތޫފާނާ ކުރިމަތި ކުރުވާފާނެ ކަމެއް ކަމަށް ކްލޫގެ ވިދާޅުވިއެވެ.
އިންޑިއާއަށް ކުރިމަތިލާން ޖެހިފައިވާ ހާލަތަކީ، ހަމަ ކޮންމެ ތަނަކަށްވެސް ކުރިމަތިވެދާނެ ހާލަތެއް ކަން ދެނެގަތުން މުހިންމު ކަމަށް ޑަބްލިއުއެޗްއޯގެ އޮފިޝަލު ވިދާޅުވިއެވެ. ބަލިމަޑުކަމުގެ މިސްރާބު ކަނޑައެޅުމުގައި ފަރުދީ އަދި އާންމު ރައްކާތެރިކަމުގެ ފިޔަވަޅުތަކުން އަދާ ކުރާ ދައުރު ބޮޑު ކަން ވެސް ކްލޫގެ ވަނީ ފާހަގަ ކުރައްވާފައެވެ.
ވިލާތަށް ބަލާއިރު އެ ސަރަހައްދުގެ އާބާދީގެ 7 ޕަސެންޓް މީހުން މިހާރު ވަނީ ކޮވިޑް ވެކްސިންގެ 2 ޑޯޒް ފުރިހަމަ ކޮށްފައެވެ.
