ފަރުވާއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19)ގެ ނުރައްކާ އެންމެ ބޮޑުވެގެންވާ ނާޒުކު ގިންތީގައި ހިމެނެނީ ލޭގެ ކޮން ގުރޫޕެއް ތޯ ބެލުމަށް، އިންޑިއާގެ ކައުންސިލް އޮފް ސައެންޓިފިކް އިންޑަސްޓްރިއަލް ރިސާޗް (ސީއެސްއައިއާރް) އިން ދިރާސާއެއް ކޮށްފިއެވެ.
ދިރާސާގެ ހޯދުންތަކަށް ބަލާއިރު ނުރައްކާ އެންމެ ކުޑަ ކަމަށް ދައްކަނީ "އޯ" ގުރޫޕުގެ ލޭ ހުންނަ މީހުންނަށެވެ. އަދި ނުރައްކާ އެންމެ ބޮޑުވާ ނާޒުކުރު ގުރޫޕުތަކަކީ "ބީ" އަދި "އޭބީ" ގުރޫޕު ކަމަށްވެސް ދިރާސާ ބުނެއެވެ.
ސީއެސްއައިއާރްގެ ތަޖުރިބާކާރުން ވިދާޅުވާ ގޮތުގައި، ސީރޯޕޮޒިޓިވިޓީ ޓެސްޓުން، "އޯ" ގުރޫޕުގެ ލޭ ހުންނަ މީހުންގެ މެދުގައި ބައްޔަށް ޕޮޒިޓިވްވާ ރޭޓު ދަށެވެ. ސީރޯޕޮޒިޓިވިޓީ ރޭޓު އެންމެ މަތީ "އޭބީ" ގުރޫޕުގެ މީހުންގެ މެދުގައި ކަމަށް ވާއިރު، ލިސްޓުގައި ދެން އޮތީ "ބީ" ގުރޫޕުކަން ފާހަގަ ކުރަންޖެހެއެވެ.
މި ދިރާސާއަށް މައުލޫމާތު އެއް ކޮށްފައި ވަނީ، އިންޑިއާގެ އެކި ކަންކޮޅުތަކުން އަމިއްލަ އިހުތިޔާރުގައި ބައިވެރިވި 10427 މީހެއްގެ ކިބައިންނެވެ. ސާވޭގެ މަސައްކަތުގައި 140 އެއްހާ ޑޮކްޓަރުން ހަރަކާތްތެރިވިއެވެ.
މި ދިރާސާއިން އާދަޔާ ހިލާފު ކަމެއްވެސް ހޯދުނެވެ. އެއީ ފުރާނައަށް އިންތިހާއަށް ގެއްލުން ދެނިވި ކަމެއް ކަމުގައި ވީ ނަމަވެސް، ދުންފަތުގެ އިސްތިއުމާލު ކުރުމަކީ ހިސާބެއްގެ ދިފާއެއް ލިއްބައިދޭ ކަމެއް ކަމަށް ބެލުމުގެ ފުރުސަތު އޮތް ކަމަށް މި ދިރާސާ ބުނެއެވެ. ނަމަވެސް މިއީ އެއްވެސް ހާލެއްގައި ދުންފަތުގެ އިސްތިއުމާލު ކުރުން ޕްރޮމޯޓް ކުރުން ނޫން ކަމަށާ، މި ރޮނގުން އިތުރު ދިރާސާތަކެއް ހަދަން ޖެހޭ ކަމަށް ސީއެސްއައިއާރުން ބުނެއެވެ.
މީގެ އިތުރުން ކޮވިޑް-19 އިން ދިފާއު ލިބިގަތުމުގައި، އެކި ޒާތުގެ މަހުން އެއްކިބާވެފައިވާ ވެޖިޓޭރިއަން ޑައެޓެއް ގެންގުޅުމަކީވެސް އެދެވޭ ނަތީޖާތަކެއް ލިއްބައިދޭ ކަމެއް ކަމަށް ސީއެސްއައިއާރްގެ ދިރާސާގައި ވަނީ ފާހަގަ ކޮށްފައެވެ.
