ފަރުވާއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19) އިން ދިފާއުވުމަށް ޖަހާ 2 ޑޯޒްގެ ވެކްސިން ފުރިހަމަ ކޮށްފައިވާ ފަރާތްތަކުން ބޭރު ތެރެއަށް ނިކުމެ އުޅޭ އުޅުމުގައި މާސްކު ބޭނުން ކުރުން މަޖުބޫރު ނޫން ކަމަށް، އެމެރިކާގެ ސެންޓާޒް ފޮ ޑިޒީޒް ކޮންޓްރޯލް (ސީޑީސީ) އިން ކަނޑައަޅައިފިއެވެ.
ސީޑީސީއިން އާންމު ކުރި އާ ގައިޑްލައިން ބުނާ ގޮތުގައި، ވެކްސިންގެ 2 ޑޯޒް ފުރިހަމަ ކޮށްފައިވާ މީހަކު އެކަނި ނުވަތަ، ޑޯޒް ފުރިހަމަ ކޮށްފައި ވާ މީހުންގެ ކުޑަ ޖަމާއަތަކާއެކު ބޭރަށް ނިކުމެ އުޅޭ އުޅުމުގައި މާސްކު ދޫކޮށްލެވިދާނެއެވެ. ނަމަވެސް ގިނަ މީހުން އެއްވާ ތަންތަނާ، އެތެރޭގެ މާހައުލުތަކުގައި މާސްކު ބޭނުން ކުރުމަށް އޮތް އުސޫލަށް ލުއި ދީފައެއް ނުވެއެވެ.
ސީޑީސީގެ ގައިޑްލައިނަށް ގެނައި ބަދަލާއެކު، އެމެރިކާގެ ރައީސް ޖޯ ބައިޑަން ވަނީ، މިއީ އެ ގައުމަށް ލިބުނު، އާދަޔާ ހިލާފު، ބޮޑު ކުރިއެރުމެއް ކަމަށް ސިފަކުރައްވާފައެވެ. މިއާއެކު، ބައިޑަން ވަނީ، ވެކްސިން ފުރިހަމަ ނުކޮށް ތިބި މީހުންވެސް ގައުމީ ކަމެއްގެ ގޮތުގައި ދެކިގެން މިކަން ފުރިހަމަ ކުރުމަށް ގޮވާލައްވާފައެވެ.
އެމެރިކާގެ އަދުގެ ހާލަތަށް ބަލާއިރު 95 މިލިއަނެއްހާ މީހުން ވަނީ 2 ވަނަ ޑޯޒް ފުރިހަމަ ކޮށްފައެވެ. ކޮވިޑް ވެކްސިން ފުރިހަމަ ކުރިކަމަށް ބުނެވެނީ، ދެ ވަނަ ޑޯޒް ޖެހިފަހުން 2 ހަފުތާ ފާއިތުވުމުންނެވެ.
