މަންމަ މަރާލުމަށްފަހު ހަށިގަނޑު ބުރިބުރިކޮށްގެން ކޭ ކަމުގެ ތުހުމަތުގައި ހައްޔަރު ކޮށްފައިވާ ސްޕެއިންގެ ފިރިހެން މީހާއާ ދެކޮޅަށް، އެ ގައުމުގައި ޝަރިޔަތް ފަށައިފިއެވެ.
ސްޕެއިންގެ ފުލުހުން، އަލްބާޓޯ ސަންޗޭޒް ހައްޔަރު ކުރީ 2019 ވަނަ އަހަރުއެވެ. އެއީ އޭނާގެ 66 އަހަރުގެ މަންމައާ ގުޅިގެން ރަހުމަތްތެރިއަކު ކަންބޮޑުވުން ފާޅު ކުރި ހިސާބުން، އެ ގެއަށް ފުލުހުން ގޮސް، ބެލި ބެލުމަށް ފަހުގައެވެ.
ފުލުހުން ބުނި ގޮތުގައި، ސަންޗޭޒް ދިރިއުޅެމުން ދިޔަ އެޕާޓްމަންޓުން، މަންމަގެ ހަށިގަނޑުގެ ބައިތައް ވަނީ ފެނިފައެވެ. އަދި ބައެއް ބައިތައް، ކޮންޓޭނަރުތަކުގައި ރައްކާކޮށްފައި ހުރި ކަމަށްވެސް ފުލުހުން ބުނެއެވެ.
ބައެއް ގުނަވަންތައް އޭރުވެސް ހުރީ ކެއްކުމުގެ މަރުހަލާގައި ކަމަށް މީޑިއާ ރިޕޯޓްތައް ބުނެއެވެ.
ދައުވާ ލިބޭ ސަންޗޭޒް ވަނީ، އޭނާގެ މަންމަގެ ހަށިގަނޑު ބުރިބުރިކޮށްގެން ކޭ ހަނދާން ނުވާ ކަމަށް ބުނެފައެވެ.
ނަމަވެސް، މަންމަ ހާސްކޮށް މަރާލުމަށްފަހު ހަށިގަނޑުގެ ބައެއް ބައިތައް ކެއުމަށްފަހު، ކުއްތާއަށްވެސް އެ ކާންދިން ކަމަށް ސަންޗޭޒް މީގެ ކުރިން އިއުތިރާފުވި ކަމަށް ހަބަރު ލިބެއެވެ.
ސަންޗޭޒްއަކީ ޕާސަނާލިޓީ ޑިސްއޯޑާގެ އިތުރުން ޑްރަގްގެ ވަބާގައިވެސް ޖެހިފައިވާ މީހެކެވެ. އަދި އޭނާއަކީ، އޭނާގެ މަންމައަށް އަނިޔާވެރި ވުމުގެ ރެކޯޑް އޮތް މީހެއް ކަމަށާ، ފުލުހުންނަށްވެސް އެކަން އެނގޭ ކަމަށް ސްޕެއިންގެ މީޑިއާއިން ބުނެއެވެ.
