ފަރުވާއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19)ގެ ކޭސްތައް ރެކޯޑް އަދަދުތަކުން ރިޕޯޓް ކުރަމުން އަންނަ އަވަށްޓެރި އިންޑިއާގެ އާބާދީގެ، 18 އަހަރުން މަތީގެ ހުރިހާ އެންމެނަށް، ކޮވިޑްއިން ދިފާއުވާ ވެކްސިން ޖެހުމަށް، އެ ގައުމުގެ ސަރުކާރުން ނިންމައިފިއެވެ.
އިންޑިއާގެ، 18 އަހަރުން މަތީގެ އާބާދީގެ ހުރިހާ އެމެނަށް ކޮވިޑް ވެކްސިން ޖެހުމަށް ނިންމާފައި ވަނީ، ބޮޑުވަޒީރު ނަރޭންދްރާ މޯދީ ރިޔާސަތު ބެލެހެއްޓެވި ބައްދަލުވުމެއްގައި، ހޯމަ ދުވަހުގެ ވަގުތެއްގައި ކަމަށް ހަބަރު ލިބެއެވެ. މި ނިންމުމަކީ، އިންޑިއާއަށް މިހާރު ކުރިމަތިވެފައިވާ ކޮވިޑް އާ ރާޅާއެކު، މިކަމަށް ލުޔެއް ހޯދުމަށް އަޅާ ފިޔަވަޅެއްގެ ގޮތުން ނިންމި ނިންމުމެއް ކަމަށް މައުލޫމާތު ލިބެއެވެ.
ކޮވިޑް-19 އިން ދިފާއުވުމަށް ހިންގާ ވެކްސިން ކެމްޕޭން މިހާރަށް ވުރެ ފުޅާ ކޮށް، އާ ދުވެއްޔެއްގައި ހިންގަން ފަށާނީ، މެއި 1، 2021 ވަނަ ދުވަހު ކަމަށް އިންޑިއާގެ މީޑިއާއިން ވަނީ ރިޕޯޓް ކޮށްފައެވެ. އެއީ ދުނިޔޭގެ އެންމެ ބިޔަ ވެކްސިން ކެމްޕޭންގެ ގޮތުގައި ސިފަކުރަމުން އަންނަ އިންޑިއާގެ ކޮވިޑް ވެކްސިން ކެމްޕޭންގެ 3 ވަނަ މަރުހަލާ ކަމަށް ހަބަރު ލިބެއެވެ.
އިންޑިއާގެ، 18 އަހަރުން މަތީގެ އާބާދީއަށް ކޮވިޑް ވެކްސިން ޖަހަން ނިންމާފައި ވާއިރު، މި ކަމަށް ބޭނުންވާ ވެކްސިން ތައްޔާރު ކުރުމަށް، ވެކްސިން އުފައްދާ ފަރާތްތަކަށް ހާއްސަ އިނާޔަތްތަކެއް ދޭނެ ކަމަށް މައުލުމާތު ލިބެއެވެ. އަދި މިކަމަށް އިންޑިއާ ތެރެއިންނާ ބޭރުން، އިތުރު ބައިވެރިން ހޯދުމަށްވެސް އިންޑިއާއިން މަސައްކަތް ކުރާ ކަމަށް ހަބަރު ލިބެއެވެ.
އެއްވެސް ފީއަކާ ނުލާ އިންޑިއާގައި ވެކްސިން ޖަހަމުން ދަނީ ސިއްހީ ހިދުމަތްތެރިންނާ، ފްރަންޓްލައިން ހިދުމަތްތެރިންގެ އިތުރުން، އުމުރުން 45 އަހަރުން މަތީގެ މީހުންނަށެވެ.
