މާލެ ސިޓީގައި ފިތުރު ޒަކާތް ބަލައިގަންނަނީ މޭ މަހުގެ 11ގެ ނިޔަލަށް ކަމަށް މިނިސްޓްރީ އޮފް އިސްލާމިކް އެފެއާޒުން ބުނެފިއެވެ.
މިނިސްޓްރީން ބުނީ މާލެ ސިޓީ (މާލެ، ހުޅުމާލެ އަދި ވިލިމާލެ) ގައި 1442 ވަނަ އަހަރުގެ ފިތުރު ޒަކާތް ބަލައިގަތުމަށް ހަމަޖެހިފާވަނީ އެޕްރީލް 13، 2021 ވަނަ ދުވަހުން ފެށިގެން މެއި 11، 2021 ވަނަ ދުވަހާ ހަމައަށް ކަމަށެވެ.
މާލޭ ސަރަހައްދުގައި މި އަހަރު އޮންލައިންކޮށް ޒަކާތް ބަލައިގަތުމަށް ނިންމާފައި ވާއިރު މާލޭގެ އިތުރުން ވިލިމާލެ އަދި ހުޅުމާލޭގައި ދިރިއުޅޭ ރައްޔިތުން ފިތުރު ޒަޔާތް ދައްކަން ޖެހޭނީ ދިރާގު ޕޭ ވެބްސައިޓު، ނައު.އެމްވީ އެޕްލިކޭޝަން ، އުރީދޫ އެމް ފައިސާ އެޕްލިކޭޝަން، އަދި އެސްއެމްއެސް މެދުވެރިކޮށެވެ.
ބީއެމްއެލްގެ ވެބްސައިޓު މެދުވެރިކޮށް ޒަކާތް ދެއްކޭ އިރު، މޯލްޑިވްސް އިސްލާމިކް ބޭންކުގެ ފައިސާނެޓް އެޕްލިކޭޝަންގެ އިތުރުން މެއިން ބްރާންޗު އަދި ހުޅުމާލެ ބްރާންޗުގެ ކައުންޓަރުތަކުން ވެސް ޒަކާތް ބަލައިގަންނާނެ އެވެ. މީގެ އިތުރުން ފަހިޕޭ އެޕްލިކޭޝަން އާއި ޕޯޓަލް އިން ވެސް ޒަކާތް ދެއްކޭނެއެވެ.
އޭގެ އިތުރުން މިނިސްޓްރީން އޮންލައިންކޮށް ފިތުރު ޒަކާތް ބަލައިގަންނާނީ މިނިސްޓްރީ އޮފް ފިނޭންސްއިން ތައާރަފް ކޮށްފައިވާ ބަނޑޭރި ޕޯޓަލް ތެރެއިން ކަމަށް މިނިސްޓްރީން ބުނެއެވެ. ބަނޑޭރި ޕޯޓަލް ތެރެއިން، ރޯދަމަހުގެ އެންމެ ފަހު ދުވަހާ ހަމައަށް ފިތުރު ޒަކާތް ދެއްކޭނެ ކަމަށް މިނިސްޓްރީން ބުނެއެވެ.
މިނިސްޓްރީން ބުނީ އުމުރުން ދުވަސްވެފައިވާ ފަރާތްތަކާއި، އޮންލައިންކޮން ޒަކާތް ދެއްކުމަށް އަހުލުވެރިނޫން ފަރާތްތަކަށް ހާއްސަކޮށް އެޕްރީލް 15 2021އިން ފެށިގެން މިނިސްޓްރީގެ ހޯލުގައި ޒަކާތް ދެއްކޭނެ އިންތިޒާމް ހަމަޖައްސާފައިވާ ކަމަށެވެ. މިނިސްޓްރީން ޒަކާތް ބަލައިގަންނަން ހަމަޖެހިފައިވަނީ ރަސްމީ ކޮންމެ ދުވަހަކު ހެނދުނު 09:30 ން 01:00 އާ ހަމައަށެވެ.
ފިތުރު ޒަކާތުގެ ގޮވާމުގެ އަގުތައް:
- އާދައިގެ ހަނޑޫ: 12 ރުފިޔާ
- ތައިލެންޑް ހުދު ހަނޑޫ: 52 ރުފިޔާ
- ބާސްމަތީ ހަނޑޫ (އާދައިގެ): 65 ރުފިޔާ
- ބާސްމަތީ ހަނޑޫ (މޮޅު): 89 ރުފިޔާ
- ބާސްމަތީ ހަނޑޫ (އެންމެ މޮޅު): 125 ރުފިޔާ
- ރަތް ހަނޑޫ: 78 ރުފިޔާ
- އާދައިގެ ފުށް: 10 ރުފިޔާ
- އާޓާ ފުށް: 59 ރުފިޔާ
މާލެ ސިޓީގައި އޮންލައިންކޮށް ފިތުރު ޒަކާތް ދެއްކޭ އިރު އެހެން ސިޓީތަކާއި ރަށްރަށުގައި ފިތުރު ޒަކާތް ބަލައިގަތުމުގެ އިންތިޒާމު ހަމަޖައްސާނީ އެރަށެއްގެ ކައުންސިލުން ކަމަށް މިނިސްޓްރީން ބުނެއެވެ.
