ކޮރޯނާވައިރަސް ޑިޒީޒް (ކޮވިޑް-19) އިން ދިފާއުވުމަށް ބޭނުން ކުރާ ވެކްސިން ޖެހުމުގެ ސަބަބުން ލޭކޮޅެއް ގަނޑުވުމުގެ ނުރައްކާ އޮތް މިންވަރާ އަޅާ ބަލާއިރު، ކޮވިޑް-19 ޖެހިގެން އެ ފަދަ ކަމެއް މެދުވެރިވުމުގެ ނުރައްކާ އެތައް ގުނައެއް އިތުރު ކަމަށް އިނގިރޭސިވިލާތުގެ އޮކްސްފޯޑް ޔުނިވާސިޓީއިން އާންމު ކުރި ދިރާސާއެއް ބުނެފިއެވެ.
ވަރަށް މަދުން ނޫނީ ނުހިނގާ ސެރެބްރަލް ވީނަސް ތުރޮމްބޯސިސް (ސީވީޓީ) އަކީ، އެހެން ގުރޫޕުތަކާ އަޅާ ބަލާއިރު، ކޮވިޑަށް ޕޮޒިޓިވްވުމަށް ފަހު މެދުވެރިވުން އާންމު ހާލަތެއް ކަމަށް މި ދިރާސާ ބުނެއެވެ. އަދި މި ކޭސްތަކުގެ 30 ޕަސެންޓު ހިއްސާ ކުރަނީ، އުމުރުން 30 އަހަރުން ދަށުގެ ޕޭޝަންޓުން ކަމަށްވެސް މައުލޫމާތު ލިބެއެވެ.
މި ދިރާސާއަކީ، އޮކްސްފޯޑް ޔުނިވާސިޓީއާ އަސްޓްރާޒެނީކާ ކުންފުނި ގުޅިގެން ތަރައްގީ ކުރި ކޮވިޑް ވެކްސިންގެ ސަބަބުން ސީވީޓީ ކޭސް ފެންމަތިވަމުން އަންނަ ކަމަށް ގައުމުތަކަކުން ރިޕޯޓް ކުރުމާއެކު ފެށި ދިރާސާއެކެވެ. ކަންމިހެން އޮތް ނަމަވެސް، ބައެއް ރެގިއުލޭޓަރުން ވަނީ، އަސްޓްރާޒެނީކާގެ ކޮވިޑް ވެކްސިނަކީ ރައްކާތެރި އަދި ކާމިޔާބު ވެކްސިނެއް ކަމަށް ކަނޑައަޅާފައެވެ.
ދިރާސާގެ ހޯދުންތަކަށް ބަލާއިރު، ސީވީޓީ ކޭހުގެ ގޮތުގައި ފާހަގަ ކުރެވިފައި ވަނީ މިލިއަނަކުން 39 ކޭހެވެ. ފައިޒާ/ބައޮއެންޓެކް ނުވަތަ މޮޑާނާ ވެކްސިން ބޭނުން ކުރި މީހުންނަށް ބަލާއިރު، މިލިއަނަކުން 4 ކޭސް ފާހަގަ ކުރެވުނުއިރު، އޮކްސްފޯޑް/އަސްޓްރާޒެނީކާގެ ވެކްސިނަށް ބަލާއިރު، މި ރޭޓް އޮތީ މިލިއަނަކުން 5 ކޭހުގެ ގޮތުގައި ކަމަށް މައުލޫމާތު ލިބެއެވެ.
