ދުނިޔޭގެ ވެކްސިން ހަބުގެ ގޮތުގައި ސިފަކުރަމުން އަންނަ އަވަށްޓެރި އިންޑިއާއަށް، ކޮރޯނާވައިރަސް ޑިޒީޒް (ކޮވިޑް-19) އިން ދިފާއުވުމަށް ބޭނުން ކުރާ ވެކްސިންގެ ސަޕްލައިގެ ދަތިކަން ކުރިމަތިވެފައި ވާ ކަމަށް ބުނެ، ފަތުރަމުން ދަނީ، އެއްވެސް އަސާސެއް ނެތް ވާހަކަތަކެއް ކަމަށް، އެ ގައުމުގެ ފެޑެރަލް ހެލްތު މިނިސްޓަރު، ހަރްޝް ވަރުދަން ވިދާޅުވެއްޖެއެވެ.
ހަރްޝް ވަރުދަން ވިދާޅުވީ މިހާރުވެސް 40 މިލިއަން ޑޯޒްގެ ވެކްސިން، ސްޓޮކުގައި ނުވަތަ ޑެލިވާ ކުރަން ގާތްވެފައި ހުންނާނެ ކަމަށެވެ. އަދި ވެކްސިންގެ ސްޕަލައިގައި ދަތިކަމެއް އުޅޭ ކަމަށް އަޑު ފަތުރަމުން ދަނީ، ބައެއް ސްޓޭޓަކުން އެކަށީގެންވާ ރޫހެއްގައި ވެކްސިން ކެމްޕޭން ކުރިއަށް ނުގެންދާ ހާލު، އެހެން މިސްރާބަކަށް ސަމާލުކަން އަނބުރާލުމުގެ ގޮތުން ކަމަށްވެސް ވަޒީރު ވަނީ ތުހުމަތު ކުރައްވާފައެވެ.
ކަން މިހެން އޮތް ނަމަވެސް، ދިއްލީގައި ގާއިމުވެފައިވާ ތިންކު-ޓޭންކެއް ކަމަށްވާ އޮބްޒާވާ ރިސާޗް ފައުންޑޭޝަން ވަނީ، ހަރްޝް ވަރްދަންގެ ރައުޔަކީ މުޅިން ސައްހަ ރައުޔަކަށް ނުވުން އެކަށީގެންވާ ކަމަށް ބުނެފައެވެ. އެގޮތުން، ހަގީގީ މައްސަލައަކީ، ވެކްސިން އުފެއްދޭނެ ކަމަށް، އެ ވެކްސިން އުފައްދާ ފަރާތްތަކުން ބުނެފައިވާ މިންވަރުތަކާ، ހަގީގަތުގައި އުފައްދާ މިންވަރާ ދެމެދު އޮތް ފަރަގަށްވުން އެކަށީގެންވާކަމަށް އޮބްޒާވާ ރިސާޗް ފައުންޑޭޝަންގެ އޫއްމެން ސީ ކޫރިއާން ވަނީ ވިދާޅުވެފައެވެ.
އިންޑިއާއިން ހިންގާ ކޮވިޑް ވެކްސިން ކެމްޕޭނަކީ މުޅި ދުނިޔޭގެ ފެންވަރުގައިވެސް ހިންގާ އެންމެ ވަރުގަދަ ކެމްޕޭނެވެ. ޖެނުއަރީ 16، 2021 ގައި އިންޑިއާއިން ވެކްސިން ކެމްޕޭން ފެށީ، ޖުލައި މަހުގެ ނިޔަލަށް 250 މިލިއަން މީހުންނަށް ވެކްސިން ޖަހާނެ ކަމުގެ އަމާޒާއެކުގައެވެ. އިންޑިއާގެ ވެކްސިން ކެމްޕޭންގައި ބޭނުން ކުރަނީ، އޮކްސްފޯޑް ޔުނިވާސިޓީއާއި އަސްޓްރާޒެނީކާ ކުންފުނީގެ ފޯމިއުލާއަށް ސީރަމް އިންސްޓިޓިއުޓް އޮފް އިންޑިއާއިން އުފައްދާ ކޮވިޝީލްޑް ވެކްސިނާއި، އިންޑިއާގެ ކުންފުންޏެއް ކަމަށްވާ ބާރަތު ބައޮޓެކްގެ ކޮވެކްސިންއެވެ.
