ކޮވިޑް-19 އިން ދިފާއުވުމަށް ޖަހާ ކޮވިޝީލްޑް ވެކްސިންގެ ދެވަނަ ޑޯޒް ރައީސް އިބްރާހިމް މުހައްމަދު ސޯލިހާއި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ޖައްސަވައިފިއެވެ.

ރައީސް ކުރެއްވި ޓްވީޓެއްގައި ވިދާޅުވީ ކޮވިޝީލްޑް ވެކްސިންގެ ދެވަނަ ޑޯޒް ފުރިހަމަ ޖައްސަވާފައިވާ ކަމަށެވެ.

އަދި ކޮވިޝީލްޑް ވެކްސިންގެ ފުރަތަމަ ޑޯޒް ޖެހިތާ 8 ހަފްތާ ވެފައިވާ ފަރާތްތަކުން ދެވަނަ ޑޯޒް ވީހާވެސް އަވަހަކަށް ފުރިހަމަ ކުރުމަށް ރައީސް ވަނީ އެދިވަޑައިގެންފައެވެ. މިހާތަނަށް ވެކްސިންގެ ފުރަތަމަ ޑޯޒް ޖަހާފައި ނުވާ ފަރާތްތަކުންވެސް، ލަސްނުކޮށް، ވެކްސިން ޖެހުމަށްވެސް ރައީސް އިލްތިމާސް ކުރެއްވިއެވެ.

ރައީސް ސޯލިހް ވެކްސިންގެ ދެވަނަ ޑޯޒް ޖައްސަވާފައި ވަނީ ސޯޝަލް ސެންޓަރުންނެވެ.

ރައީސް ނަޝީދުވެސް ކޮވިޝީލްޑް ވެކްސިންގެ ދެވަނަ ޑޯޒް ޖައްސަވާފައި ވަނީ މިއަދެވެ. ރައީސް ނަޝީދު ވެކްސިންގެ ދެވަނަ ޑޯޒް ސެނެހިޔާ ހޮސްޕިޓަލުން ޖައްސަވާފައި ވާކަން ހާމަ ކޮށްފައި ވަނީ މަޖިލީހުންނެވެ.

ކޮވިޑް-19 އިން ދިފާއުވުމަށް ޖަހާ ކޮވިޝިލްޑް ވެކްސިންގެ ދެވަނަޑޯޒް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ފުރިހަމަކުރައްވާފައި/ ފޮޓޯ: މަޖިލިސް

ކޮވިޑް-19އިން ދިފާއުވުމަށް ރާއްޖޭގައި ވެކްސިން ޖެހުމުގެ ޕްރޮގުރާމު ފެށުމުގެގޮތުން ރައީސް ސޯލިހް ވެކްސިންގެ ފުރަތަމަ ޑޯޒް ޖައްސަވާފައި ވަނީ މިދިޔަ ފެބްރުއަރީ މަހުގެ ފުރަތަމަ ދުވަހެވެ. އެ ދުވަހު ރައީސް ނަޝީދުވެސް ވަނީ ކޮވިޑް ވެކްސިންގެ ފުރަތަަމަ ޑޯޒް ޖައްސަވާފައެވެ.

ކޮވިޑް ވެކްސިން، ކޮވިޝީލްޑްގެ ދެވަނަ ޑޯޒް ރާއްޖޭގައި އާންމުކޮށް ޖަހަން ފަށާފައި ވަނީ ހޮނިހިރު ދުވަހެވެ.

މިހާރުވެސް ކޮވިޑް ވެކްސިންގެ ފުރަތަމަ ޑޯޒް ޖެހުން ކުރިއަށް ގެންދެއެވެ. އެގޮތުން އިއްޔެ 3147 މީހަކަށް ފުރަތަމަ ޑޯޒް ޖަހާފައި ވެއެވެ. މިހާތަނަށް ރާއްޖެއިން 246،896 މީހަކަށް ވެކްސިން ޖަހައިފިއެވެ.