ނޫސްވެރިކަމުގެ އިނާމަށް ކުރިމަތިލުމުގެ މުއްދަތު އިތުރު ކޮށްފި

މޯލްޑިވްސް މީޑިއާ ކައުންސިލް (އެމްއެމްސީ) އިން ދޭ، ނޫސްވެރިކަމުގެ އިނާމަށް ނަން ހުށަހެޅުމުގެ މުއްދަތު އިތުރުކޮށްފިއެވެ.

އެމްއެމްސީއިން ބުނީ އިނާމަށް ކުރިމަތިލާން ހުޅުވާލާފައިވާ މުއްދަތު މާޗް 25 ވާ ބުރާސްފަތި ދުވަހުގެ 13:00އަށް އެ މުއްދަތު އިތުރުކޮށްފައިވާ ކަމަށެވެ.

މި އަހަރު އިނާމު ދިނުމަށް ނިންމާފައި ވަނީ 12 ދާއިރާއަކުންނެވެ. އިނާމު ދިނުމަށް ކަނޑައެޅިފައިވާ ދާއިރާތަކަކީ:

1. ތަހުގީގީ ނޫސްވެރިކަން (އިންވެސްޓިގޭޓިވް ޖާނަލިޒަމް)
2. ދެމެހެއްޓެނިވި ތަރައްގީ އާއި އިޖުތިމާއީ
3. ސިޔާސީ
4. ޝަރުއީ އަދި ގާނޫނީ
5. ވިޔަފާރިއާއި އިގްތިސޯދު
6. ކުޅިވަރު
7. ފޮޓޯ ޖާނަލިޒަމް
8. ވީޑިއޯ ޖާނަލިޒަމް
9. އޯޑިއޯ ޖާނަލިޒަމް
10. ނިއުސް ގްރެފިކްސް އާއި އިލެސްޓްރޭޝަންސް
11. ފީޗާ / ރިޕޯޓް
12. އެންމެ އުންމީދީ ނޫސްވެރިޔާ

2014 ވަނަ އަހަރުން ފެށިގެން އެމްއެމްސީން އަންނަނީ ނޫސްވެރިކަމުގެ އިނާމު އެކި ދާއިރާތަކުން ދެމުންނެވެ. ހަމަ އެހެންމެ އެ އެވޯޑަކީ ވަކި ބަޔަކަށް "ބަހާ" އެވޯޑެއް ކަމަށް ބުނެ ގިނަ ބައެއްގެ ފާޑުކިޔުންވެސް އަމާޒުވެފައިވާ އެވޯޑެކެވެ. އެ ގޮތުން އެވޯޑު ކޮމިޓީގައި ނޫސްވެރިކަމުގައި ހިމެނޭ ޒުވާން ކުދިން ތިބުމުން އިންސާފުވެރިކޮށް ޖަޖު ކުރަން ނޭނގުމަކީ ބައެއް މީހުން ފާހަގަ ކުރާ މައްސަލައެކެވެ.