ކޮވިޑް-19އާ ގުޅޭ ދޮގު މައުލޫމާތު ފަތުރާ ދިވެހި ވެބްސައިޓެއްގެ މައްސަލަ ބެލުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ނިންމައިފިއެވެ.
ރޭ ދަރުބާރު ގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެޗްޕީއޭގެ ޑިރެކްޓާ އަހުމަދު ނާސިރު ވިދާޅުވީ ކޮވިޑް-19އާ ގުޅޭ ސައްހަ ނޫން ދޮގު މައުލޫމާތު ދައުރުކުރާ ވެބްސައިޓެއްގެ މައްސަލަ ފާހަގަ ކުރެވިފައިވާ ކަމަށާއި އެ ވެބްސައިޓުގެ މައްސަލަ ކަމާބެހޭ ފަރާތްތަކުން ބަލަމުން އަންނަ ކަމަށެވެ.
މީގެ އިތުތުރުން އޭނާ ވިދާޅުވީ ސިއްހީ ގޮތުން ރަނގަޅު ނޫން މައުލޫމާތު ފަތުރާ ވެބްސައިޓުތަކާއި، ފޭސްބުކް ޕޭޖުތައް ވެސް އެބަހުރި ކަމަށާއި އެފަދަ ވަސީލަތްތަކުން ފަތުރާ މައުލޫމާތު ބަލައިނުގަތުމަކީ ވަރަށް މުހިއްމު ކަމެއް ކަމަށެވެ.
ކޮވިޑާ ގުޅޭ ސައްހަ ނޫން މައުލޫމާތު ދައުރުކުރަނީ "އަމިއްލަ ސިއްހަތު" ކިޔާ ވެބްސައިޓަކުންނެވެ. އެޗްއީއޯސީން އެ ވެބްސައިޓްގެ މައްސަލަ ބަލަމުންދާ ކަމަށް ބުނެފައި ވާއިރު، އެ ވެބްސައިޓުން މިފަދަ ދޮގު މައުލޫމާތުތަކެއް ފަތުރާތީ އެކަމަށް ފިޔަވަޅު ނާޅައިގެން އާންމުން ސޯޝަލް މީޑިއާގައި ދަނީ ކަންބޮޑުވުން ފާޅު ކުރަމުންނެވެ.
ހަމަ ތިހެން އަދި ވިދާޅުވިޔަކަސް ނުފުދޭނެ. ފަތުރާ ދޮގަކީ ކޮބައިކަމާ އަދި އޭގެ ހުއްޖަތްވެސް ދައްކަންޖެހޭނެ. އެސައިޓުގަ ހުންނަމަޢުލޫމާތު ހުންނަނީ ހެއްކާއެއްކޮށް. އެހެންވުމުން އެއީ ދޮގު މަޢުލޫމާތުކަމަށް ބުނާނަމަ ދޮގުކަން ސާބިތު ކޮށްދެންވާނެ.
ދައުލަތާއި ދައުލަތުން ބަލއިގަންނަ ތަންތަނުން އެކަނިތޯ ތެދު މައުލޫމާތު ފެތުރެނީ! މިނޫން ތަނަކުން ވާހަކައެއް ދައްކައިފިނަ އެއްވެސް ހުއްޖަތެއްނެތި ސީދާ އެއީ ދޮގު ވާހަކަ ދައްކާ ބައެއްކަން ކަނޑއެޅުމުގެ ހައްޤު ވަނީ ކޮންބަޔަކަށްތޯ! ހަގީގަތަކީ ގިނަފަހަރު ދައުލަތްތަކުން ފަތުރާނީ ހުސް ދޮގު. މިއީ ރައްޔިތުން ނުދަންނަކަމެއް ނޫން.