ލޯކަލް ޕޮލިސިންގް ޕްރައިއޯރިޓީގެ ދަށުން މި އަހަރުގެ ތެރޭގައި އިތުރު 42 ޕޮލިސް ސްޓޭޝަން ގާއިމު ކުރުމުގެ މަސައްކަތް ކުރަމުން އަންނަ ކަމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
މިއަދު ރައްޔިތުން މަޖިލިސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސް ސޯލިހް ވިދާޅުވީ، ކުޑަކުދިން ކުރާ ކުށްތަކާއި، ކުޑަކުދިންނަށް ކުރާ ގޯނާތަކާއި، ގެވެށި އަނިޔާ އާއި ޖިންސީ ގޯނާތަކާ ގުޅުން ހުރި ކުށްތައް ބަލައި ތަހުގީގު ކުރުމަށް ފުލުހުންގެ ތެރޭގައި ހާއްސަ ވިންގެއް މިދިޔަ އަހަރު ވާނީ އުފައްދާފައި ކަމަށެވެ.
އޭގެ އިތުރުން ސައިބާ ކްރައިމްގެ މައްސަލަތައް ބެލުމަށް ހާއްސަ ޑިޕާޓްމަންޓެއް، މިއަހަރުގެ ތެރޭގައި ފުލުހުންގެ ހިދުމަތަށް އިތުރުވެގެން ދާނެ ކަމަށް ރައީސް ވިދާޅުވިއެވެ. އަދި ލޯކަލް ޕޮލިސިންގް ޕްރައިއޯރިޓީގެ ދަށުން މިއަހަރުގެ ތެރޭގައި، އިތުރު 42 ޕޮލިސް ސްޓޭޝަން ގާއިމް ކުރަން މަސައްކަތް ކުރާ ކަމަށް ރައީސް ވިދާޅުވިއެވެ.
މީގެ އިތުރުން މިހާރު އައްޑޫގައި ހަދަމުން އަންނަ، ނޭޝަނަލް ކޮލެޖް އޮފް ޕޮލިސިންގް އެންޑް ލޯ އެންފޯސްމަންޓް ސެންޓަރު ވެސް މި އަހަރުގެ ތެރޭގައި ރަސްމީކޮށް ހުޅުވައި ހިދުމަތް ދޭން ފެށޭނެ ކަމަށް ރައީސް ވިދާޅުވިއެވެ. އަދި މިހާރު ފުލުހުންގެ ގާނޫނީ އޮނިގަނޑަށް ގެނެސްފައިވާ ބަދަލުތަކާ އެކު، ފުލުހުންގެ ހިދުމަތުގެ ފެންވަރު ރަނގަޅުވެ ރައްޔިތުންގެ އިތުބާރާއި ލޯބި ލިބިގެންދާނެ ކަމަށް ދެކެވަޑައިގަންނަވާ ކަމަށް ރައީސް ވިދާޅުވިއެވެ.
ދިވެހި ފުލުހުންގެ ހިދުމަތް ޕްރޮފެޝަނަލް ކޮށް ނެއިބަހުޑް ޕޮލިސިންގެ އުސޫލުން ހިދުމަތް ދިނުމަށް، މިދިޔަ އަހަރުގެ ތެރޭގައި މުހިންމު ގިނަ މަސައްކަތްތަކެއް ކުރެވިފައިވާ ކަމަށް ރައީސް ވިދާޅުވިއެވެ. އޭގެ ނަތީޖާވެސް ވަރަށް ރަނގަޅު ކަމަށާއި ﷲގެ ރަޙްމަތްފުޅުން، މިދިޔަ އަހަރުގެ ތެރޭގައި، ގުރޫޕް މާރާމާރީއެއްގައި އެއްވެސް މީހެއްގެ ފުރާނަ ގެއްލިފައި ނުވާކަން އުފަލާއެކު ފާހަގަކުރައްވާ ކަމަށް ރައީސް ވިދާޅުވިއެވެ.
