ރައީސް އިބްރާހިމް މުހައްމަދު ސޯލިހުގެ މި އަހަރުގެ ރިޔާސީ ބަޔާން ދެއްވުން، މާދަމާ އޮންނާނެއެވެ.
ރައީސް އިބްރާހިމް މުހައްމަދު ސޯލިހް ރިޔާސީ ބަޔާން އިއްވަވާ ދުވަހަކީ، ރައްޔިތުންގެ މަޖިލިސް ވެސް ހުޅުވާ ދުވަހެވެ. އެހެންކަމުން އެ ދުވަހަކީ ސަރުކާރު ބަންދު ދުވަހެއް ކަމަށް ރައީސް ސޯލިހް ވަނީ ކަނޑައަޅުއްވާފައެވެ. މާދަމާ ހެނދުނު 9:00 ގައި އޮންނަ މަޖިލީހުގެ ޖަލްސާގައި އެޖެންޑާ ކޮށްފައި ވަނީ ހަމައެކަނި ރިޔާސީ ބަޔާން އިއްވުމަށެވެ.
ގާނޫނުއަސާސީގައިވާ ގޮތުގެ މަތިން ކޮންމެ އަހަރެއްގައި ވެސް ރައްޔިތުންގެ މަޖިލީހުގެ ފުރަތަމަ ޖަލްސާ އަށް ރައީސްގެ ރިޔާސީ ބަޔާން އިއްވަވާނެއެވެ. ރިޔާސީ ބަޔާނުގައި އެ އަހަރުގެ ތެރޭގައި ސަރުކާރުން ކުރާން ނިންމާފައިވާ ކަންކަމާ ގުޅޭ މައުލޫމާތު ރައީސް ހިއްސާ ކުރައްވާނެއެވެ.
މާދަމާ އިއްވަވާނީ ރައީސް ސޯލިހު ދެއްވާ ތިންވަނަ ރިޔާސީ ބަޔާނެވެ. އެއީ ރައްޔިތުންގެ މަޖިލީހުގެ އާ ދައުރެއް ފަށަން ބާއްވާ ފުރަތަމަ ޖަލްސާއެވެ. އެގޮތުން ސަރުކާރުން މުޅި އަހަރު ތެރޭގައި ކުރަން ނިންމާފައިވާ މުހިންމު މަސައްކަތްތަކަށް އަލިއަޅުވާލައްވާނެއެވެ. ރިޔާސީ ބަޔާން އިއްވުން މިދިޔަ އަހަރު އޮތީ ރައްޔިތުންގެ މަޖިލީހުގެ ތަޅުމުގައެވެ. އޭގެ ކުރީއަހަރު އޮތީ ދަރުބާރުގޭގައެވެ. މިއަހަރު ވެސް އޮންނާނި ރައްޔިތުންގެ މަޖިލީހުގައެވެ.
މިދިޔަ އަހަރު ރިޔާސީ ބަޔާން އިއްވި ޖަލްސާގައި އިދިކޮޅު މެންބަރުން ވަނީ ކުރީގެ ރައީސް އަބްދުﷲ ޔާމީން މިނިވަން ކުރުމަށް ގޮވާލާ ޕޯސްޓަރުތަކަކާއެކު ހިމޭން އިހުތިޖާޖެއް ކޮށްފައެވެ. ރިޔާސީ ބަޔާން އިއްވެވި ވަގުތު އިދިކޮޅު މެންބަރުން އިހުތިޖާޖު ކުރައްވަމުން ގެންދިޔަ ނަމަވެސް، ރައީސް ސޯލިހް ވަނީ ބަޔާން އިއްވެވުން ކުރިއަށް ގެންދަވާފައެވެ.
