ކޮވިޑް ވެކްސިން ޕްރޮގްރާމް ރައީސް އިބްރާހިމް މުހައްމަދު ސޯލިހު ފައްޓަވައި ދެއްވައިފިއެވެ. އަދި 4 ވަނަ ވެކްސިން ޖެއްސެވީ ރައީސް އެވެ.
ރައީސް ސޯލިހު ވެކްސިން ޖައްސަވާފައި ވަނީ ރާއްޖޭގައި ވެކްސިން ޖެހުމަށް ސޯޝަލް ސެންޓަރުގައި ބޭއްވި ހާއްސަ ރަސްމިއްޔާތުގައެވެ.
ރައީސް ސޯލިހުގެ އިތުރުން މަޖިލީހުގެ ރައީސް، ރައީސް މުހައްމަދު ނަޝީދާއި ސަރުކާރުގެ އެކި މުއްސަސާތަކުގެ އިސްވެރިންވެސް ކޮވިޑް ވެކްސިން ޖެހުމަށް ވަނީ ހަމަޖެހިފައެވެ.
ރާއްޖޭގައި ފުރަތަމަ ވެކްސިން ޖައްސަވާފައި ވަނީ ޑރ. ޝިރާނީ އަބްދުއްރަހުމާނެވެ.
ފްރަންޓްލައިންގައި މަސައްކަތް ކުރައްވާ ސިއްހީ ދާއިރާގެ ބޭފުޅުންނާއި، އެހެނިހެން ހިދުމަތްތަކުގައި ފްރަންޓްލައިންގައި ހަރަކާތްތެރިވާ ފަރާތްތަކާއި، ބަލީގެ ނުރައްކާތެރިން ބޮޑު ނުވަތަ އުމުރުން ދުވަސްވީ މީހުން ހިމެނޭ ގޮތުން ޖުމްލަ 34 ފަރާތަކަށް މިއަދު ވެކްސިން ދިނުމަށް ވަނީ ހަމަޖެހިފައެވެ.
މިއަދު ރާއްޖޭގެ 6 ސަރަަހައްދެއްގައި ވެކްސިން ދިނުމަށް ވަނީ ހަމަޖެހިފައެވެ. އެ ގޮތުން މާލެ ސަރަހައްދުން އައިޖީއެމްއެޗް އާއި އޭޑީކޭއާއި ހުޅުމާލެ ހޮސްޕިޓަލުގެ އިތުރުން ސެނެހިޔާ ހޮސްޕިޓަލް ހިމެނެއެވެ. މީގެ އިތުރުން އައްޑޫ އިކުއެޓޯރިއަލް ހޮސްޕިޓަލާއި ކުޅުދުއްފުށި ރީޖަނަލް ހޮސްޕިޓަލް ވެސް ހިމެނެއެވެ.
ވެކްސިން ޖަހަން ދާ މީހުން ސަމާލުވާން ޖެހޭ ކަންކަމުގެ ތެރޭގައި އާންމު ދަތުރުފަތުރުގެ ހިދުމަތް ބޭނުން ނުކުރުމަށް އެޗްއީއޯސީން އިލްތިމާސް ކުރެއެވެ.
މީގެ އިތުރުން ވެކްސިން ޖެހުމަށް ފަހު އެތަނުގައި 15 މިނެޓް މަޑުކުރަން ޖެހޭނެ ކަމަށް ވެސް އެޗްއީއޯސީން ބުނެއެވެ. ނަމަވެސް އެލާޖިކްވާ މީހުން 30 މިނެޓް މަޑު ކުރަން ޖެހޭނެ ކަމަށާއި ސިއްހީ ގޮތުން ދިމާވެދާނެ މައްސަލައަކަށް ވެކްސިން ދޭ ތަންތަނުގައި ސިއްހީ ހިދުމަތްތެރިން ތައްޔާރަށް ތިބޭނެ ކަމަށް އެޗްއީއޯސީން ބުނެއެވެ.
