ހުޅުމާލެގައި ހުންނަ މަސްޖިދުލް އަޒީޒާ މޫސާ މިސްކިތުގައި ނަމާދަށް ހުރި ދޮށީ އުމުރުގެ ދިވެއްސެއްގެ ކަރުގައި ހިފި މައްސަލާގައި ހައްޔަރުކުރި އިންޑިއާ މީހާ ޑީޕޯޓް ކޮށްލީ ކީއްވެކަން ޕީޖީ އޮފީހުން ސާފު ކޮށްދީފިއެވެ.
ޕީޖީ އޮފީހުން ބުނީ، އެ މީހާ ޑީޕޯޓް ކުރުމަށް ނިންމީ، މި މައްސަލައިގެ ޒާތާއި ބާވަތަށާއި، ލިބިފައިވާ ގެއްލުމާއި، ތުހުމަތުކުރެވޭ މީހާގެ ކުށުގެ ރެކޯޑާއި، މައްސަލައިގައި ކަން ހިނގާފައިވާ ގޮތަށް ރިއާޔަތް ކުރި އިރު މި މައްސަލާގައި ޖިނާއީ ދައުވާއެއް ކުރުމަށް ވުރެ މަސްލަހަތު ބޮޑީ ތުހުމަތު ކުރެވޭ ފަރާތް ޑީޕޯޓް ކޮށްލުމުން ކަމަށް ފެންނާތީ ކަމަށެވެ. އަދި މި ނިންމުން ނިންމުމުގެ ކުރިން މައްސަލާގައި އަނިޔާ ލިބުނު ފަރާތާ އެ އޮފީހުން މަޝްވަރާކޮށް މައްސަލަ ކުރިއަށް ގެންދިއުމާ މެދު ދެކޭގޮތް ބަލާފައިވާނެ ކަމަށް ޕީޖީ އޮފީހުން ބުނެއެވެ.
ހަމައެއާއެކު މައްސަލަ އެ އޮފީހަށް ހުށަހެޅި އިރު ތަހުގީގު ކުރި ފަރާތުން ވެސް ހިޔާލު ދިނީ އިންޑިއާ މީހާ ޑީޕޯޓް ކޮށްލުމުގެ މަސްލަހަތު ބޮޑު ކަމަށް ކަން ޕީޖީ އޮފީހުން ބުނެއެވެ
ޕީޖީ އޮފީހުން އިތުރަށް ބުނީ މިއީ ރާއްޖޭގައި ދިރިއުޅޭ ބިދޭސީން ކުރާ ކުށްތަކުގެ ބާވަތާއި ލިބުނު ގެއްލުމާއި މައްސަލައިގެ ވަށައިގެންވާ އެންމެހައި ކަންކަމަށް ރިއާޔަތްކޮށް ކުރިން ވެސް އަމަލު ކުރާ ގޮތެއް ކަމަށެވެ. އަދި މިބާވަތުގެ ނިންމުންތައް ނިންމުމުގައި ކުށުގެ ތުހުމަތު ކުރެވޭ މީހާ ވަކި ގައުމަކަށް ނިސްބަތް ވުމަކީ ނިންމުމަށް އަސަރުކުރާނެ ކަމެއް ނޫން ކަމަށް އެ އޮފީހުން ބުނެއެވެ.
މިކަމާ ގުޅިގެން ފުލުހުން ބުނެފައި ވަނީ، ހުޅުމާލޭ މިސްކިތެއްގައި އުމުރުން ދުވަސްވީ މީހަކަށް ހަމަލާދިން ކަމުގެ ތުހުމަތުގައި ހައްޔަރު ކުރި އިންޑިއާ މީހާގެ މައްސަލައިގެ ތަހުގީގު ނިންމާ، މިދިޔަ ހަފްތާ ތެރޭގައި ޕްރޮސެކިއުޓާ ޖެނެރަލްގެ އޮފީހަށް ފޮނުވާފައިވާ ކަމަށެވެ. އަދި މި މައްސަލަ ޕީޖީއަށް ފޮނުވުމުން، އޭނާ ޑިޕޯޓް ކުރުމަށް ނިންމާފައި ވަނީ ޕީޖީން ކަމަށް ފުލުހުން ބުނެއެވެ. ފުލުހުން ބުނީ، އިންޑިއާ މީހާ ޑީޕޯޓް ކުރުމަށް ޕީޖީން ނިންމުމާއެކު، އޭނާ އިމިގްރޭޝަނާ ހަވާލު ކޮށްފައިވާ ކަމަށެވެ.
މި ހާދިސާ ހިނގާފައި ވަނީ މިމަހު 15 ވަނަ ދުވަހުއެވެ. ފުލުހުން ބުނީ މިސްކިތަށް ނަމާދަށް އެރި އުމުރުން ދުވަސްވީ މީހެއްގެ ގައިން ނުބައި ވަސްދުވާތީ ކަމަށް ބުނެ އިންޑިއާ ފިރިހެނެއް އޭނާ މިސްކިތުން ނެރެން އުޅެ މާރާމާރިއެއް ހިންގާފައިވާ ކަމަށެވެ. އަދި މި މައްސަލައާ ގުޅިގެން ބަލަން ޖެހޭ ކަންކަން ބަލަމުންދާ ކަމަށް ވެސް ފުލުހުން ވަނީ ބުނެފައެވެ.
'ދަ ޕްރެސް' އަށް މައުލޫމާތު ލިބިފައިވާ ގޮތުގައި މި ހާދިސާ ހިންގާފައި ވަނީ އަސްރު ނަމާދުގެ ޖަމާއަތް ނިމުނު ފަހުންނެވެ. އިންޑިއާ ރައްޔިތެއް އެ މިސްކިތަށް އަރާ އެ ވަގުތު ނަމާދަށް ހުރި ދޮށީ އުމުރުގެ ދިވެއްސެއްގެ ކަރުގައި ހިފުމުން އެ މިސްކިތުގައި ތިބި މީހުން ވަނީ އެކަން ހުއްޓުވާފައެވެ.
މި ހާދިސާގައި ނަމާދަށް އެރި ދިވެހި މީހާ، މޫސާ މުހައްމަދު ބުނީ އޭނާ ނަމާދަށް މިސްކިތަށް އެރި އިރު އެ އިންޑިއާ މީޙާ އުޅުނީ ފާހާނާ ބަރިތައް ކައިރީގައި ކަަމަށެވެ. އަދި އޭނާ ނަމާދަށް އަރައަރާ ހުއްޓާ އައިސް އެ އިންޑިއާ މީހާ އޭނާ ހިފައްޓާފައި ގަމީހުގެ ގިރުވާނުގައި ހިފި ކަމަށް އޭނާ ބުނެއެވެ. އަދި އޭނާ ނަމާދަށް އަރަނީ ކަމަށް ބުނުމުން އެ އިންޑީއާ މީހާ އެކަމާ ދެކޮޅު ހަދައި އޭނާ ހިފައްހައްޓަން މަސައްކަތް ކޮށް ޖަހަން އުޅުނު ކަމަށް ވެސް އޭނާ ބުނެއެވެ. އަދި ޖަހައިގެން ނުވާނެ ކަމަށް ބުނުމުން އެ އިންޑިއާ މީހާ މޫސާ މުހައްމަދުގެ ފަޓްލޫނުގެ ފަހަތު ޖީބު ބަލައި ފާސްކުރަން އެދުނު ކަމަށް އޭނާ ބުނެއެވެ.
އޭނާ ބަަލައި ފާސްކުރަންވީ ސަބަބެއް ނޭނގޭ ކަމަށް މޫސާ ބުނެއެވެ. އަދި އޭނާ އަކީ ބަލި މީހެއް ކަމަށާއި ނަމާދަށް އެރީވެސް ގޮނޑިއެއް ހިފައިގެން ކަމަށް ބުނެއެވެ. މޫސާ މުހައްމަދަކީ މާލޭގައި އުޅޭ މާލެ ރައްޔިތެކެވެ. އޭނާ ހުޅުމާލެއަށް ދިޔައީ އޭނާގެ އާއިލާގެ ބަޔަކު ހުޅުމާލޭގައި ދިރިއުޅޭތީ ކަމަށާއި ނަމާދަށް އެ މިސްކިތަށް ދިޔައީ އެހެންވެ ކަމަށް އޭނާ ބުނެއެވެ.
