އއ. ތޮއްޑޫން މާލެއަށް އައި މީހަކު ކޮވިޑަށް ޕޮޒިޓިވްވުމާ ގުލީގެން އެރަށް މޮނިޓަރިންގެ ހާލަތަށް ބަދަލުކޮށްފިއެވެ.
ހެލްތް ޕްރޮޓެކްޗަން އެޖެންސީ (އެޗްޕީއޭ) އިން ބުނީ، ތޮއްޑޫން މާލެއަށް އައި މީހަކު ކޮވިޑަށް ޓެސްޓުކޮށް އޭނާގެ ނަތީޖާ ޕޮޒިޓިވްވުމާ ގުޅިގެން އެރަށް މިއަދު މޮނިޓަރިންގެ ހާލަތަށް ބަދަލުކޮށްފައިވާ ކަމަށެވެ.
މިފަދައިން ރަށެއް މޮނިޓަރިންގެ ހާލަތަށް ބަދަލު ކުރުމުން އެރަށަކުން ރެންޑަމް ސާމްޕަލް ނެގުމުގެ މަސައްކަތް ކުރިއަށް ދާނެއެވެ. އަދި އެރަށުން މީހުން އަރާ ފޭބުން މަނާ ކޮށް ރަށުގައި މަގު މައްޗަށް ނުކުމެ އުޅޭ އިރު މާސްކް އަޅަން ޖެހޭނެއެވެ.
ދާދި ފަހުން މ. ކޮޅުފުށިން މާލެއަށް އައި މީހަކު ވެސް ކޮވިޑް ބަލީގެ އަލާމަތް ހުރުމުގެ ސަަބަބުން ޓެސްޓުކޮށް ވަނީ ޕޮޒިޓިވްވެފައެވެ. މި ކޭސްއާ ގުޅިގެން ކޮޅުފުށި މޮނިޓަރިންގެ ހާލަަތަށް ބަދަލުކޮށް އެ ރަށުގައި ވެސް ވަނީ ރެންޑަމް ސާމްޕަލް ނަގާފައެވެ. އެގޮތުން މިހާރު އެ ރަށުން 105 ރެންޑަމް ސާމްޕަލް ނަގާފައިވާ އިރު 9 މީހަކު މިއަދު ވަނީ ކޮވިޑަށް ޕޮޒިޓިވް ވެފައެވެ.
