އިންޑިއާގެ ކޮޗިން މި އަދު ހދ. ކުޅުދުއްފުއްޓަށް އައުމަށް ހަމަޖެހިފައިވާ ބޯޓުގައި 700 ޓަނުގެ މުދާ ގެންނާނެ ކަމަށް އެސްޓީއޯގެ މެނޭޖިން ޑިރެކްޓަރު ހުސެއިން އަމްރު ވިދާޅުވެއްޖެއެވެ.
މޯލްޑިވްސް ސްޓޭޓް ޝިޕިން (އެމްއެސްއެސް) އިން މިއަދު ކުޅުދުއްފުއްޓަށް ބަނދަރުކުރުމަށް ހަމަޖެހިފައިވާ ބޯޓުގައި 700 ޓަނުގެ މުދާ ގެންނާނެވެ. އަދި އެއް ފަހަރަށް ވުރެ އަނެއް ފަހަރު ކާގޯ ފެރީގައި ރާއްޖެއަށް ގެންނަ މުދަލުގެ އަދަދު އިތުރުވެގެން ދާނެ ކަމަށް ވެސް އޭނާ ވިދާޅުވިއެވެ.
ކޮޗިން ފެރީއިން ރާއްޖެއަށް ދަތުރު ފެށީ މިދިޔަ ސެޕްޓެމްބަރު މަހު 20 ވަނަ ދުވަހެވެ. އެގޮތުން އެ ދުވަހު އިންޑިއާގެ ސޫތުކުޅިން ފުރައިގެން ކޮޗިނަށް ކައިރި ކުރުމަށް ފަހު އެމަހު 26 ވަނަ ދުވަހު ކުޅުދުއްފުއްޓަށް ވަނީ ލަފާފައެވެ. މި ފެރީ ދަތުރު ކުރަން ހަމަޖެހިފައިވާ މަގަކީ ސޫތުކުޅި، ކޮޗިން، ކުޅުދުއްފުށި އަދި މާލެއެވެ.
މި ބޯޓަކީ 3000 މެޓްރިކް ޓަނުގެ މުދާ އުފުލޭ އުޅަނދެކެވެ. ކުޅުދުފުއްޓާއި އިންޑިއާއާ ދެމެދު ބާއްވާ އެ ކާގޯ ފެރީ ދަތުރު ކުރުމަށް ހަމަޖެހިފައި ވަނީ މަހަކު ދެ ފަހަރެވެ. މި ފެރީއިން މުދާ އުފުލަން ފެށުމާއެކު، ކުޅުދުއްފުށީގެ ރައްޔިތުންނަށް ވަނީ ތަކެތި އަގު ހެޔޮކޮށް ގަނެވޭނެ މަގު ފަހިވެފައެވެ.
ރާއްޖެ-ކޮޗިން ފެރީއާ ގުޅޭ ގޮތުން އިކޮނޮމިކް މިނިސްޓަރު ފައްޔާޒް އިސްމާއީލް ވިދާޅުވެފައި ވަނީ އިންޑިއާ ކޮޗިން ފެރީއަކީ އިންޑިއާ އާއި ދިވެހިރާއްޖެއާ ދެމެދު މިހާރުވެސް ކުރަމުން އަންނަ ގާތްގަނޑަކަށް 4 ބިލިއަނެއްހާ ރުފިޔާގެ މުއާމަލާތް ތަކުން، ރާއްޖެއަށް އެތެރެކުރެވޭ މުދަލުގެ އަގު، ހެޔޮ ކުރުމަށް ލިބޭނެ ފުރުސަތެއް ކަމަށާއި ކުރިއަށް އޮތް 5 އަހަރަށް ބެލިކަމުގައި ވިޔަސް، ބޮޑެތި އާބާދީތަކަށް ލާމަރުކަޒީ ފުދުންތެރިކަން ހޯދައިދިނުމަށްޓަކައި، އިގްތިސޯދު މިހާރަށް ވުރެ ބޮޑަށް ހުޅުވާލަން ޖެހޭ ކަމަށާއި، މިއީ، އެ މަންޒިލަށް ވާސިލުވުމަށް އެޅޭ ބިންގަލެއް ކަމަށެވެ.
އިންޑިއާ ފެރީގެ ދަތުރުތައް ދެކުނުން ހުވަގު އަތޮޅަށްވެސް ވަނީ ފަށާފައެވެ.
އެސްޓީއޯގެ ޝިޕިންގ ކުންފުނީގެ ބޭނުމަކީ ކޮބާ؟؟