ދައުލަތުގެ ވަކީލަކު ދެކެ ލޯބިވާ ކަމަށް ކޯޓުގައި މީހަކު ބުނެފިއެވެ.
މައުލޫމާތު ލިބުނު ގޮތުގައި އެމީހާ އެހެން ބުނެފައިވަނީ ކްރިމިނަލް ކޯޓުގައި ކުރިއަށް ދިޔަ މަސްތުވާތަކެތީގެ މައްސަލައެއްގެ ޝަރީއަތުގެ މަޖިލީހެއްގައެވެ.
އެގޮތުން މި ހަފްތާގައި ކްރިމިނަލް ކޯޓުގައި ބޭއްވި އަޑުއެހުމެއްގައި ގާޒީ އެ މައްސަލައިގެ ޝަރީއަތް ކުރިއަށް ގެންދަވަނިކޮށް އެ މައްސަލައިގައި ވަކާލާތު ކުރި ޕްރޮސެކިއުޓާ ޖެނެރަލްގެ އޮފީހުގެ އަންހެން ވަކީލަކު ދެކެ ލޯބިވާ ކަމަށް އެމީހާ ވަނީ ބުނެފައެވެ.
އޭނާ އެހެން ބުނުމާ ގުޅިގެން ގާޒީ ވަނީ އެ މައްސަލަ ކޯޓުގެ ހުރުމަތް ކެނޑުމުގެ މައްސަލައެއްގެ ގޮތުގައި ބަލާފައެވެ.
އެކަމާ ގުޅިގެން ކްރިމިނަލް ކޯޓުގެ މީޑިއާ އޮފިޝަން އަމާން މުހައްމަދު ނަޖީބު ވިދާޅުވީ ޝަރީއަތުގެ މަޖިލީހެއްގައި ދައްކައިގެން ނުވާނެ ޒާތުގެ ވާހަކައެއް ދެއްކުމާ ގުޅިގެން އޭނާ ކޯޓުގެ ހުރުމަތް ކެނޑުމުގެ މައްސަލައެއް ބަލާފައިވާ ކަމަށެވެ.
ނަޖީބު ވިދާޅުވީ އެމައްސަލަ އާ ގުޅިގެން އެމީހާ މައާފަށް އެދުމުން އޭނާއަށް އެއްވެސް އަދަބެއް ދީފައި ނުވާކަމަށެވެ.
އެމީހާއަށް އަދަބު ދީފައި ނުވަނީ އެކަމާ ގުޅިގެން އެމީހާ މައާފަށް އެދުމުންނާއި އަދި މީގެ ކުރިން އެފަދަ ކަމެއް އޭނާގެ ކިބައިން ފެނިފައި ނުވާތީ ކަަމަށެވެ.
ޝަރީއަތުގެ މަޖިލީހުގައި ކޯޓުގެ ހުރުމަތް ކެނޑޭ ފަދަ ވާހަކައެއް ދައްކައިފި ނަމަ އެއީ ވަގުތުން އަދަބު ދެވިދާނެ ކުށެކެވެ. އެގޮތުން ކޯޓުގެ ހުރުމަތް ކެނޑޭ އަމަލެއް ކޮށްފިނަމަ 15 ދުވަހަށް ވުރެ ދިގު ނޫން މުއްދަތަކަށް ޖަލަށްލުން ނުވަތަ، ގިނަވެގެން އެއް މަހަށް ގޭ ބަންދު ކުރުން، ނުވަތަ 10،000 ރުފިޔާއަށް ވުރެ ބޮޑު ނޫން އަދަދަކުން ޖޫރިމަނާ ކުރުން ހިމެނެއެވެ.
