ގައުމީ އެއާލައިން ހިންގާ އައިލެންޑް އޭވިއޭޝަން (އައިއޭއެސް)އަށް މިއަހަރު ލިބުނު ގެއްލުން 110 މިލިއަން ރުފިޔާ އަށް އަރައިފިއެވެ.
ސަރުކާރު ހިއްސާވާ ކުންފުނިތަކުގެ ކަންތައް ބަލަހައްޓާ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އާންމުކުރި 2020 ވަނަ އަހަރުގެ ދެވަނަ ކުއާޓާގެ މާލީ ހިސާބުތައް ދައްކާގޮތުން ސަރުކާރު ހިއްސާވާ ކުންފުނިތަކުގެ ތެރެއިން ދެވަނައަށް އެންމެ ބޮޑަށް ގެއްލުން ވެފައިވަނީ އައިލޭންޑް އޭވިއޭޝަން އަށެވެ.
އެގޮތުން މިދިޔަ އަހަރުގެ ދެވަނަ ކުއާޓާ އަޅަބަލާއިރު މިއަހަރުގެ ދެވަނަ ކުއާޓަރުގައި އައިލެންޑް އޭވިއޭޝަނުގެ އާމްދަނީ 76 ޕަސެންޓް ވަނީ ދަށްވެފައެވެ. މިދިޔަ އަހަރުގެ ދެވަނަ ކުއާޓާގައި އެ ކުންފުންޏަށް އާމްދަނީގެ ގޮތުގައި 457 މިލިއަން ރުފިޔާ ލިބުނު އިރު މި އަހަރުގެ އެ މުއްދަތުގައި ލިބިފައިވަނީ 109 މިލިއަން ރުފިޔާއެވެ.
އައިއޭއެސްއަށް މިދިޔަ އަހަރުގެ ދެވަނަ ކުއާޓާގައި 12.5 މިލިއަން ރުފިޔާގެ ގެއްލުމެއް ލިބުނު އިރު މި އަހަރުގެ ދެވަނަ ކުއާޓަރުގައި އެ ކުންފުންޏަށް ލިބުނު ގެއްލުން ވަނީ 110 މިލިއަން ރުފިޔާ އަށް އަރައިފައެވެ.
ޕީސީބީން ބުނީ އައިއޭއެސް އަށް ލިބުނު ގެއްލުން އިތުރުވެފައިވަނީ ކޮވިޑް-19ގެ ބަލިމަޑުކަމާއެކު، އެކުންފުންޏަށް އާމްދަނީ ލިބުނު ގިނަ ކަންތައްތައް ހުއްޓުމަކަށް އައުމުން ކަމަށެވެ. އެގޮތުން ފްލައިޓު ދަތުރުތަކާއި ސީޕްލޭން އޮަޕަރޭޝަންތައް ހުއްޓުމުން ޕެސެންޖާ އާމްދަނީގެ ގޮތުގައި ލިބުނު އަދަދު 257 މިލިއަން ރުފިޔާ ދަށްވެފައިވާ ކަމަށް އެ ރިޕޯޓްގައިވެއެވެ.
