މޯލްޑިވްސް މީޑިއާ ކައުންސިލް (އެމްއެމްސީ) ގެ ރައީސް ކަމަށް ސަންގު ޓީވީގެ ނިއުސް ހެޑް ޝަހުބާން ފަހުމީ އަދި ނައިބު ރައީސްކަަށް ތިލަދުންގެ ޗީފް އެޑިޓަރު ހުސައިން ސަގީފް އައްޔަން ކޮށްފިއެވެ.
އެމްއެމްސީގެ ރައީސް އާއި ނައިބު ރައީސް އިންތިހާބު ކުރީ އެ ކޮމިޝަންގެ 6 ވަނަ ދައުރަށް ހޮވުނު މެންބަރުންނާ އެކު މިއަދު ބޭއްވި ޖަލްސާގައެވެ. އެގޮތުން މިއަދު ބޭއްވި ޖަލްސާއަކީ އަލަށް ހޮވި މެންބަރުންނާ އެކު ބޭއްވި ފުރަތަމަ ޖަލްސާއެވެ.
މިއަދުގެ ޖަލްސާގައި ރައީސް ކަމަށް ވާދަކުރައްވާފައި ވަނީ ޝަހުބާންގެ އިތުރުން ޕީއެސްއެމްގެ އަލީ ހުސައިންއާއި އާންމުންގެ ތެރެއިން އިންތިހާބުވި މެންބަރު މުހައްމަދު ޝަފާއު އެވެ. މެންބަރުން ދެއްވި ވޯޓުގެ ނަތީޖާއަށް ބަލާއިރު، ޝަހުބާނަށް ލިބުނީ ހަ ވޯޓެވެ. އަލީ ހުސައިނަށް ފަސް ވޯޓު ލިބުނު އިރު، ޝަފާއުއަށް ލިބުނީ ތިން ވޯޓެވެ.
ނައިބު ރައީސްކަމަށް ވާދަ ކުރައްވާފައި ވަނީ ސަގީފް އެކަންޏެވެ. އޭނާ އެ މަގާމަށް އިންތިހާބުވީ ފެންނަ ނުފެންނަ ވޯޓެއް ނަގައިގެން 14 މެންބަރުންގެ ތާއީދާ އެކުގައެވެ.
މޯލްޑިވްސް މީޑިއާ ކައުންސިލް އެކުލެވިގެން ވަނީ 15 މެންބަރުންގެ މައްޗަށެވެ. އެއީ މީޑިއާގެ 8 މެންބަރުންނާއި އާންމުންގެ 7 މެންބަރުންގެ މައްޗަށެވެ. މި ދައުރު ހަމަވާނީ ދެ އަހަރު ތެރޭގައެވެ.
