މޯލްޑިވްސް މީޑިއާ ކައުންސިލް (އެމްއެމްސީ) އިން ދޭ ނޫސްވެރިކަމުގެ އިނާމު ހަފްލާ މިރޭ ބާއްވަން ނިންމައިފިއެވެ.
އެމްއެމްސީން ބުނީ "ނޫސްވެރިކަމުގެ އިނާމު 2019" ބާއްވަން ހަމަޖައްސާފައި ވަނީ މިރޭ 9:00 ގައި ކަމަށާއި ޕީއެސްއެމުން އެ އިވެންޓް ލައިވްކޮށް ދައްކާނެ ކަމަށެވެ.
މިއަހަރުގެ ނޫސްވެރިކަމުގެ އިނާމަށް 11 ދާއިރާއަކުން 80 ހުށަހެޅުން ހުށަހަޅައިފައިވާ ކަމަށް އެމްއެމްސީއިން ބުނެއެވެ. އެގޮތުން އެންމެ ގިނަ ހުށަހެޅުން ހުށަހަޅާފައި ވަނީ ފީޗާ އަދި ރިޕޯޓް ދާއިރާއަށެވެ. އެ ދާއިރާއަށް ޖުމްލަ 29 މީހަކު ވަނީ ހުށަހަޅާފައެވެ. އެއަށް ފަހު އިޖްތިމާއީ، ތާރީހާއި ސަގާފަތް އަދި ފަންނުވެރިކަމުގެ ދާއިރާއަށް 11 މީހަކު ވަނީ ހުށަހަޅާފައެވެ.
ސިޔާސީ ދާއިރާއަށް 9 މީހަކު، ވިޔަފާރިއާއި އިގްތިސޯދު ދާއިރާއަށް 6 މީހަކު، ފޮޓޯ ޖާނަލިޒަމް އަށް 5 މީހަކާއި ވީޑިއޯ ޖާނަލިޒަމްއަށް 2 މީހަކު ފޯމް ހުށަހަޅާފައި ވެއެވެ.
ހަމައެއާއެކު ޝަރުއީ އަދި ގާނޫނީ ދާއިރާއަށް 4 މީހަކާއި، ކުޅިވަރު ދާއިރާއަށް 4 މީހަކާއި ތަހުގީގީ ނޫސްވެރިކަމަށް 2 މީހެއް ފޯމް ހުށަހަޅާފައި ވެއެވެ. މީގެ އިތުރުން ތިމާވެއްޓާއި ދެމެހެއްޓެނިވި ތަރައްގީއަށް 3 މީހަކަކާއި އެންމެ އުންމީދީ ނޫސްވެރިއާގެ އިނާމަށް 5 މީހަކު ވަނީ ފޯމް ހުށަހަޅާފައެވެ.
މިފަހަރު އިނާމްތައް ދޭއިރު ތަހުގީގީ ނޫސްވެރިކަމުގެ ދާއިރާއަކީ މުޅިން އަލަށް ތައާރަފްކުރި ދާއިރާއެކެވެ.
