މަސްތުވާތަކެއްޗާ ދެކޮޅަށް ފުލުހުން ކުރިއަށް ގެންދިޔަ ބޮޑު އޮޕަރޭޝަނެއްގައި ނޫސްވެރިން ބައިވެރިކުރުމުގެ ސަބަބުން އެ ނޫސްވެރިން ހޯދި ހެކިތައް ގެއްލިގެން ނުދާނެ ކަމަށް ދެކެވަޑައިގަންނަވާ ކަަމަށް ކުރީގެ ޕްރޮސެކިއުޓާ ޖެނެރަލް އަދި ބާ ކައުންސިލްގެ މެންބަރު އަހުމަދު މުއިއްޒު ވިދާޅުވެއްޖެއެވެ.
ރައްޔިތުންގެ މަޖިލީހުގެ ކުރީގެ ހާއްސަ މަޖިލީހުގެ މެންބަރު ކަންވެސް ކުރައްވާފައިވާ މުއިއްޒު ވަނީ ދާދި ފަހުން ފުލުހުން ހިންގި އެންޓި ސްޓްރީޓް ޑީލިން އޮޕަރޭޝަންގައި ބަލައި ފާސްކުރުމުގެ ކަންކަމުގައި ނޫސްވެރިން ބައިވެރިކުރި އިރު އެ ކަމަށް ކޯޓުގެ ހުއްދަ ހޯދަން ޖެހޭ ކަމާ މެދު ސުވާލު އުފައްދަވާފައެވެ. އަދި އެކަމުގައި ނޫސްވެރިން ބައިވެރިކުރުމުގެ ސަބަބުން ހޯދި ހެކި ކޯޓުން ގަބޫލު ކުރުމުގެ ފުރުސަތު ގެއްލިގެން ނުދާނެކަމަށް ދެކޭ ކަމަށް އޭނާ ވިދާޅުވިއެވެ.
މި އޮޕަރޭޝަން ކުރިއަށް ގެންގޮސްފައި ވަނީ މިދިޔަ ބުރާސްފަތު ދުވަހން ފެށިގެން 72 ގަޑިއިރަށެވެ. މި އޮޕަރޭޝަންގައި ހަރަކާތްތެރިވުމަށް ރާއްޖޭގެ ހަތަރު މީޑިއާއަކަށް ވަނީ ފުރުސަތު ދީފައެވެ.
މި އޮޕަރޭޝަންއާ ގުޅިގެން ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވެފައި ވަނީ، ހަތަރު މީޑިއާއަކުން އެ އޮޕަރޭޝަންގައި ބައިވެރިވެފައިވާ ކަމަށާއި މީޑިއާތައް މި އޮޕަރޭޝަންގައި ބައިވެރި ކުރީ "އިމްޕެކްޓް ޖާނަލިޒަމް" އަށް ފުރުސަތު ދިނުމަށް ކަމަށެވެ. މަސްތުވާތަކެތި ބޭނުން ކުރުމާއި އެތަކެތި ވިޔަފާރި ކުރުމާ ގުޅުން ހުރި އޮޕަރޭޝަންތަކުގައި ކުރިއަށް އޮތްތާނގައި ވެސް ނޫސްވެރިން ބައިވެރިކުރާނެ ކަމަށާއި އެއީ ކަންކަން ހިނގާ ގޮތާ ދޭތެރޭ ހޭލުންތެރިކަން އިތުރު ކުރުމަށް ކުރާ ކަމެއްގެ ގޮތުގައި ސީޕީ ވަނީ ވިދާޅުވެފައެވެ.
އެ އޮޕަރޭޝަނުގައި ބައިވެރިކޮށްފައި ވަނީ ޕީއެސްއެމް އާއި ސަން އޮންލައިންގެ އިތުރުން ރާއްޖެ އެމްވީ އަދި މިހާރު އޮންލައިންނެވެ.
