އިންޑިއާއާއި އައްޑުއަތޮޅު ހިތަދޫއާއި އަދި ހުވަދު އަތޮޅު ތިނަދޫއަށް ފެރީގެ ހިދުމަތް ފަށަން ތައްޔާރު ވެފައިވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އެމަނިކުފާނު މިކަން އިއުލާން ކުރެއްވީ ހއ. ހޯރަފުށީ އެއާޕޯޓް ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. ރައީސް ސޯލިހް ވިދާޅުވީ، ކުޅުދުށްފުށްޓަށް ސީދާ ކޮޗިންއިން ޑައިރެކްޓްކޮށް މުދާ އެބަ ގެނެވޭ ފަދައިން އައްޑުއަށާއި ހުވަދުއަތޮޅަށް ސީދާ ޓުޓިކޮރިންއިން ބޯޓުފަހަރު އާދެވޭގޮތަށް ހަމަޖެހިފައިވާ ކަމަށެވެ. އަދި އެސްޓީއޯގެ ޝިޕިން ކުންފުނިން އެ މަސައްކަތް ކުރިއަށް އޮތް ދެ ހަފުތާގެ ތެރޭގައި ފަށާނެ ކަމަށް ރައީސް ސޯލިހް ވިދާޅުވިއެވެ.
އިންޑިއާއިން އައްޑުއާއި ތިނަދޫއަށް ކާގޯ ފެރީގެ ހިދުމަތް ފަށަން ހަމަޖެހިފައި ވާއިރު، އެ ދެ ތަނަކީ މީގެ ކުރިން ބައިނަލްއަގްވާމީ ޝެޑިއުލް ފެރީތައް އަންނަ ތަންތަނެއް ނޫނެވެ. އައްޑުއަށް މީގެ ކުރިން ވެސް ވަނީ އިންޑިއާއިން ޑައިރެކްޓްކޮށް ކާގޯ ބޯޓު ގެންގޮޮސްފައެވެ. ނަމަވެސް ޝެޑިއުލް ކާގޯއެއް އެތަނަކަށް ވެސް ނުގެންދެއެވެ.
މިހާރު ފެށުމަށް ހަމަޖެހިފައިވާ އެސްޓީއޯގެ ކާގޯ ފެރީގައި މައިގަނޑު ގޮތެއްގައި ގެނައުމަށް ހަމަޖެހިފައި ވަނީ ކޮންސްޓްރަކްޝަން ތަކެއްޗާއި ކާބޯތަކެއްޗެވެ. އޭގެ ތެރޭގައި މޭވާއާއި ތަރުކާރީގެ އިތުރުން ކުކުޅު ބިސް، ގަނޑުކުރި ތަކެތޮ، އަދި ޖެނެރަލް ކާގޯ ހިމެނެއެވެ.
މި ދެ ޕޯޓަށް އިންޑިއާގެ ފެރީގެ ހިދުމަތް ފެށުމުން އެ ސަރަހައްދަށަ މާލެއިން ކާޑާއި، ހިލަ، ހިލަވެލި ފަދަ ތަކެތި ނުގެންގޮސް ވާނެއެވެ. ނަމަވެސް ބައެއް އެހެނިހެން މުދާ މާލެއިން ގެންދަން ޖެހޭނެއެވެ. އޭގެ ތެރޭގައި ފޮތް، ފަންސުރު، ރީތިވާ ސާމާނު އަދި ބައެއް ބާވަތުގެ ބޭސްތައް ހިމެނެއެވެ.
އަލަަށް ފަށަން ހަމަޖެހިފައިވާ ފެރީގެ ސަބަބުން ދެކުނުގެ ވިޔަފާރިވެރިންނަށް، މާލޭގެ ވިޔަފާރިތަކާ އެއްފަދައިން ވިޔަފާރި ކުރެވޭނެ މަގު ފަހިވެގެން ދާނެއެވެ. އެގޮތުން މުދަލުގެ އެޖެންސީ ނަގައި، އެ މުދަލެއް ހޯލްސޭލް ކުރުން ފަދަ ވިޔަފާރި ކުރުމުގެ ފުރުސަތު ލިބިގެން ދާއިރު، މިއީ ދެކުނު ވިޔަފާރިތައް ބޮޑުތަނުން ކުރިއަރައިގެން ދާނެ ކަމެކެވެ. އެއާއެކު ވަޒީފާތައް އުފެދި، މުޅި ސަރަހައްދުގެ އިގްތިސޯދަށް ހެޔޮ ބަދަލެއް އަންނާނެއެވެ.
އިންޑިއާއިން އުތުރުގެ ކުޅުދުއްފުއްޓާއެކު ވެސް ވަނީ ކާގޯ ފެރީ ފަށާފައެވެ. މިއީ ރާއްޖެ ލާމަރުކަޒު ކުރުމުގެ މަސައްކަތަށް ލިބުނު ބޮޑު ކުރިއެރުމެއް ކަމަށް ކަމާ ބެހޭ ފަރާތްތަކުން ދަނީ ބުނަމުންނެވެ.
