ލޮނުޒިޔާރަތް ޕާކަށް ވަނުމުގެ ކުރިން އަތްދަބަސް ޗެކް ކުރާނެ

ލުނިޒިޔާރަތް ޕާކު ނިންމާ، އިއްޔެ ހަވީރު ހުޅުވާފައިވާއިރު އެ ޕާކަށް ވަންނައިރު، އަތް ދަބަސް ޗެކް ކުރާނެ ކަމަށް މާލެ ސިޓީ ކައުންސިލުން ބުނެފިއެވެ.

ސިޓީ ކައުންސިލުން މައުލޫމާތު ދީފައިވާ ގޮތުގައި ލޮނުޒިޔާރަތް ޕާކު ހުޅުވާނީ ފަތިހު 4:30 އިން ހެނދުނު 9:30 އަށާއި ހަވީރު 4:30 ން ރޭގަނޑު 9:30 އަށް ކަމަށެވެ. އެ ކައުންސިލުން ވަނީ ލޮނިޒިޔާރަތް ޕާކަށް ވަނދެ ނިކުމެ އުޅުމުގައި ގެންގުޅޭނެ ގައިޑްލައިންތައް އާންމުކޮށްފައެވެ.

ސިޓީ ކައުންސިލުން ނެރުނު ލިސްޓުގައި ބުނީ، ޕާކުތެރޭގައި ކުނިއަޅަންވާނީ އެކަމަށް ހާއްސަކޮށް ބަހައްޓާފައި ހުރި، ކުނިއަޅާ ވަށިގަނޑުތަކަށް ކަމަށާއި، ފެން އެޅުމަށްޓަކައި، ފެން އަޅާ ފުޅި ޖެހޭނީ އަމިއްލައަށް ގެންދަން ކަމަށެވެ. އަދި ޕާކު ތެރެއަށް އެއްވެސް ބާވަތެއްގެ ކާބޯތަކެތި ވައްދައި ކައިބޮއި ހެދުމަކީ މަނާކަމެއް ކަމަށާ، އެއްފަހަރު ބޭނުންކޮށްފައި އުކާލާ ޒާތުގެ ޕްލާސްޓިކް ޕާކު ތެރޭގައި ބޭނުން ކުރުމާއި ދުންފަތުގެ އިސްތިއުމާލު ކުރުމަކީ މަނާކަމެއް ކަމަށެވެ.

ހަމައެއާއެކު ތޫނުތަކެތި ނުވަތަ އެއްވެސް ބާވަތެއްގެ ހަތިޔާރެއް ޕާކު ތެރެއަށް ވެއްދުމަކީ މަނާކަމެއް ކަމަށާއި، ޕާކަށް ވަނުމުގެ ކުރިން އަދި ޕާކުން ނުކުތުމުގެ ކުރިން އަތްދަބަސް ޗެކް ކުރެވޭނެ ކަމަށް ސިޓީ ކައުންސިލުން ބުނެއެވެ. ކައުންސިލުން ބުނީ، ޕާކު ތެރޭގައި އުޅޭ ހުރިހާ ވަގުތެއްގައިވެސް، އެކަކު އަނެކަކަށް އިހްތިރާމް ކުރަން ވާނެ ކަމަށާއި، އެއްވެސް މީހެއްގެ ނުރުހުމުގައި ހަނގާކޮށް، މައްލަވަކޮށް ފޮށި އެހެންމީހެއްގެ ގައިގައި އަތްލާ ހަދައިގެން ނުވާނެ ކަމަށެވެ. މިކަމަށް ފާރަވެރިވުމަށް ސިޓީ ކައުންސިލުން ވަނީ އެ ޕާކުގައި ސީސީޓީވީ ކެމެރާ ހަރުކޮށްފައެވެ.

ޕާކުގައި ހުންނަ ގަސްގަހާގެއްސަށް ގެއްލުން ދިނުމަކީ މަނާކަމެއް ކަމަށާ ޕާކުތެރޭގައި ހުރި އިމާރާތަކަށް، ގަހަކަށް، ނުވަތަ އެއްޗަކަށް ގެއްލުމެއް ދީފިނަމަ އެކަމަށް ފިޔަވަޅު އަޅާނެ ކަމަށް ސިޓީ ކައުނސިލުން ބުނެއެވެ. މީގެ އިތުރުން އެ ކައުންސިލުގެ ގައިޑްލައިންގައި ވަނީ ކޮވިޑް-19 އިން ރައްކާތެރިވުމަށް އެޗްޕީއޭއިން އަޅަން އަންގާފައިވާ ފިޔަވަޅުތައް ވެސް ހިމަނާފައެވެ.

އެގޮތުން ޕާކު ތެރޭގައި އުޅޭ ހުރިހާ ވަގުތެއްގައިވެސް، އުޅެންވާނީ ނޭފަތާއި އަނގަ ނިވާވާގޮތަށް މާސްކް އަޅައިގެން ކަމަށާއި، ޕާކަށް ޒިޔާރަތް ކުރާ އެންމެހައި ފަރާތްތަކުން، ޕާކުތެރޭގައި އުޅޭއިރު، އެކަކު އަނެކަކާ ދެމެދު 3 ފޫޓު ދުރުމިން (އިޖްތިމާއީ ގައިދުރުކަން) އަބަދުވެސް ބަހައްޓަވަންވާނެ ކަމަށް އެ ގައިޑްލައިނުގައިވެއެވެ. އަދި ހުން އައިސް، ކެއްސައި، ކިނބިހި އެޅުމުގެ އެއްވެސް އަލާމާތެއް ފާހަގަ ކުރެވޭނަމަ، ޕާކަށް ޒިޔާރާތް ނުކުރުމުގެ އިތުރުން ޕާކު ތެރޭގައި އުޅޭ ހުރިހާ ވަގުތެއްގައި ވެސް، ސައިބޯނި ލައިގެން އަތް ދޮވުން ނުވަތަ ސެނިޓައިޒާ ބޭނުންކޮށްގެން އަތްސާފުކުރުމަށް ވެސް އެ ގައުޑްލައިނުގައިވެއެވެ.