މިދިޔަ ދެ އަހަރުގެ ތެރޭގައި، ރައްޔިތުންނަށް ލިބިދެވުނު އެންމެ ބޮޑު އިންސާނީ ހައްގަކީ، އަދި ހޯދައިދެވުނު އެންމެ ބޮޑު ކުރިއެރުމަކީ، ހަމަޖެހުމާއި ސުލްހަ މަސަލަސްކަމާއެކު، ދިރިއުޅެވޭނެ މާހައުލެއް ގާއިމުކޮށްދެވުން ކަމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، ޖުމްހޫރީ ދުވަހުގެ މުނާސަބަތުގައި ގައުމާ މުހާތަބު ކުރައްވާ ދެއްކެވި ވާހަކަފުޅުގައެވެ. ގައުމާ މުހަތަބު ކުރައްވާ އެމަނިކުފާނު ވަނީ ވެރިކަމާ ހަވާލުވެވަޑައިގެންނެވި ފަހުންވި 2 އަހަރު ތެރޭގައި ކުރެވުނު ކަންތައްތަކުގެ ކުރު ހުލާސާއެއް ދެއްވާފައެވެ.
ރައީސް ސޯލިހް ވިދާޅުވީ، އިޖުތިމާއީ ހަމަޖެހުމަށް ބަލާއިރު މީގެ ދެ އަހަރު ކުރިން، ރާއްޖޭގެ ރައްޔިތުން ތިބީ ވަރަށް ބޮޑު ނުތަނަވަސްކަމެއްގެ ތެރޭގައި ކަމަށެވެ. މާރާމާރީއާއި ގޭންގު ކުށްތައް އިތުރުވެ، ސިޔާސީ ހަމަނުޖެހުން ބޮޑުވުމުގެ ސަބަބުން އިޖުތިމާއި ހަމަޖެހުން އޮތީ މުޅިންހެން ގެއްލިފައި ކަމަށެވެ. އަދި ރައްޔިތުން އެދެމުން ދިޔައީ، ހަމަޖެހިގެން ދިރިއުޅެވޭނެ މާހައުލެއް ގާއިމުކޮށްދިނުމަށް ކަމަށާއި އެކަން ކުރެވުމަކީ ރައްޔިތުންނަށް ލިބިދެވުނު އެންމެ ބޮޑު އިންސާނީ ހައްގާއި، އެންމެ ބޮޑު ކުރިއެރުން ކަމަށް އެމަނިކުފާނު ސިފަ ކުރެއްވިއެވެ.
މުޖުތަމައުގެ ސުލްހަ މަސަލަސްކަމަށް ރާއްޖޭގެ ގައުމީ ދިފާއީ ބާރާއި، ދިވެހި ފުލުހުން އަދާކުރި މުހިންމު ދައުރު ފާހަގަކޮށް، ރައީސް ސޯލިހް ވަނީ ދިވެހި ސިފައިންނާއި ފުލުހުންނަށް ޝުކުރު ދަންނަވާފައެވެ.
މީގެ އިތުރުން ރައީސް ސޯލިހް ވިދާޅުވީ، މި ސަރުކާރު ފެށުނުއިރު، ރައްޔިތުންގެ ވަރަށް ގިނަ އަސާސީ ހައްގުތަކެއް ހުރީ ހިފެހެއްޓިފައި ކަމަށެވެ. އަދި އެމަނިކުފާނު މަގާމާ ހަވާލުވެވަޑައިގަތުމަށްފަހު، އެންމެ ފުރަތަމަވެސް ރައްޔިތުންނަށް އަނބުރާ ހޯދައިދިން އަސާސީ ހައްގުތަކަކީ، ހިޔާލުފާޅު ކުރުމުގެ މިނިވަންކަމާއި، ނޫސްވެރިކަމުގެ މިނިވަންކަމުގެ ހައްގާއި، މައުލޫމާތު ހޯދައި ލިބިގަތުމުގެ ހައްގުގެ މިނިވަންކަން ކަމަށެވެ.
އެގޮތުން ފުރިހަމަ ޑިމޮކްރެޓިކް ޖުމްހޫރީ ވެރިކަމެއް ދެމިއޮތުމަށްޓަކައި، ހިޔާލު ފާޅުކުރުމުގެ މިނިވަންކަމާއި، ނޫސްވެރިކަމުގެ މިނިވަންކަމަކީ، ކޮންމެހެން ލިބިދޭންޖެހޭ ހައްގުތަކެއް ކަމަށް ރައީސް ސޯލިހް ވިދާޅުވިއެވެ. އެމަނިކުފާނު ވިދާޅުވީ، ނޫސްވެރިކަމުގެ މިނިވަންކަމަކީ، އޭގެ ބޭނުން ހިފާ ގޮތަކުން، ގައުމުގެ މިސްރާބު ކޮންމެ ގޮތަކަށް ވެސް ބަދަލު ކޮށްލެވިދާނެފަދަ ބާރެއް ކަމަށެވެ. ހަމަނުޖެހުމެއްގެ ތެރެއަށް ވެސް ވައްޓާލެވިދާނެ ކަމަށާއި ހަމަޖެހުމާއި ސުލްހަ މަސަލަސްކަންވެސް ގައުމުގައި ފަތުރާލެވިދާނެ ކަމަށް އެމަނިކުފާނު ފާހަގަ ކުރެއްވިއެވެ.
ސިޔާސީ ލިޑަރުން ޖަލަށް ލާފަ އޮތިމަ ހަމޖެހުން. ތިޔަ ހަމަޖެހުމަކި ޕެންޑަމިކާ ގުޅިގެން ތައް ރއްޔިތުން ކެތްކޮލައިގެން ތިބިތިބުން