ދީނީ ހަރުކަށި ފިކުރުގައި ހައްދު ފަހަނަ އަޅާފައި ވާ ފިކުރުގެ މީހުން ގިނަ އަދަދަކަށް ދިރިއުޅެމުން އަންނަ ޕާކިސްތާނުގައި، ކަނޑިން ޖަހާ ބޯބުރިކުރުމަށް ކުޑަ އަންހެން ކުދިންތަކަކަށް ދަސްކޮށްދޭ ކަމަށް ބުނާ މަންޒަރުތަކެއް ފެންނަ ވީޑިއޯއެއް ވައިރަލް ވާން ފަށައިފިއެވެ.
ޓްވިޓާގައި ވައިރަލް ވާން ފެށި މި ވީޑިއޯ، ބައިނަލްއަގުވާމީ މީޑިއާގެ ރާޑަރަށް އަރާފައި ވާއިރު، މިއީ އިސްލާމް ދީނާއި ދެކޮޅަށް ފަރަންސޭސިވިލާތުގައި ހިންގާ ނޭއްގާނީ އަމަލުގެ ސަބަބުން، އެކަމުގެ ބަދަލު ހިފުމަށް ކުދިން ތައްޔާރު ކުރުމަށް ހިންގާ އަމަލެއް ކަމަށްވެސް ވަކާލާތު ކުރެވެއެވެ.
ސޯޝަލް މީޑިއާގައި ދައުރުވާ މަންޒަރުތަކުން ފެންނަ ގޮތުގައި، ފިޔާ ތޮށި ހެދުމުގައި، ބުރުގައި އަޅައިގެން ތިބި ކުޑަ އަންހެން ކުދިންގެ އަތުގައިވެސް "ކަނޑި" އޮވެއެވެ. އަދި އެކުދިން ދަނީ، އިސްކޮށް ހުރި ޓީޗަރުގެ އިރުޝާދާ އެއް ގޮތަށް، ކަނޑިން ޖަހާ، ބޯބުރިކޮށްގެން މީހުން މަރާނެ ގޮތް ނަކަލު ކޮށް، ފަރިތަ ކުރަމުންނެވެ. މީގެ އިތުރުން، އެ މަންޒަރުތައް ފޯނަކަށް ރެކޯޑް ކުރަން ހުންނަ އިތުރު އަންހެނަކުވެސް ފެނެއެވެ.
މިކަމާ ގުޅިގެން ޕާކިސްތާނުން އަދި ރަސްމީ ސިފައެއްގައި އެއްޗެއް ބުނިކަން ނުވަތަ ނޫންކަން ސާފެއް ނުވެއެވެ.
