މިދިޔަ އަހަރުގެ ފަހުކޮޅު ޗައިނާއިން ފުރަތަމަ ފަހަރަށް ރިޕޯޓް ކުރި ކޮރޯނާވައިރަސް ޑިޒީޒް (ކޮވިޑް-19) އަށް، ދުނިޔޭގެ އެކި ކަންކޮޅުތަކުން ޕޮޒިޓިވްވި މީހުންގެ އަދަދު 46 މިލިއަނަށް ވުރެ މައްޗަށް އަރައިފިއެވެ.
މިރޭގެ 08:30 ގެ ނިޔަލަށް ލިބިފައިވާ އެންމެ ފަހުގެ ތަފާސް ހިސާބުތައް ދައްކާ ގޮތުން، ދުނިޔޭގެ އެކި ކަންކޮޅުތަކުން 216 ގައުމަކާއި ސަރަހައްދަކުން، ޖުމުލަ 46083198 މީހަކު ވަނީ މިހާތަނަށް ކޮވިޑް-19 އަށް ޕޮޒިޓިވްވެފައެވެ.
ރޭ މެންދަމު، (ޖީއެމްޓީ ގަޑިން) 00:00 އިން ފެށިގެން މިހާތަނަށް ބަލާއިރު ކޮވިޑް-19 ޖެހިގެން ރެކޯޑް އަދަދަކަށް ކޭސް ރިޕޯޓް ކޮށްފައި ވަނީ ޕޯލަންޑްއިންނެވެ. ޕޯލަންޑްއިން 21897 ކޭސް ރެކޯޑް ކޮށްފައި ވާއިރު، އިންޑިއާއިން ވަނީ 21736 ކޭސް ރެކޯޑް ކޮށްފައެވެ. ބެލްޖިއަމްއިން ވެސް ކޭސް ރެކޯޑް ކޮށްފައި ވަނީ 20 ހާހަށް ވުރެ މަތިންނެވެ.
ދުނިޔޭގެ ނިސްބަތުން ބަލާއިރު ކޮވިޑް-19ގެ ކޭސްތައް އަދިވެސް އެންމެ ގިނައީ އެމެރިކާ (9326675)، އިންޑިއާ (8157902)، ބްރެޒިލް (5519528)، ރަޝިއާ ( 1618116)، ފްރާންސް (1331984) އަދި ސްޕެއިން (1264517) ގައެވެ. 1 މިލިއަން ފާހަގަ ހުރަސް ކުރި ގައުމުތަކުގެ އަދަދުވެސް މިހާރު ވަނީ 8 އަށް އަރާފައެވެ. އެ ގައުމުތަކުގެ ތެރޭގައި ސްޕެއިންގެ ފަހަތުން ދެން ހިމެނެނީ އާޖެންޓީނާއާއި ކޮލަމްބިއާއެވެ. އިނގިރޭސިވިލާތުންވެސް ދަނީ 1 މިލިއަން ފާހަގަ ހުރަސް ކުރުމާ ގާތަށް ޖެހެމުންނެވެ.
ދިވެހިރާއްޖެ ހިމެނޭ ދެކުނު އޭޝިއާ ސަރަހައްދަށް ބަލާއިރު އިންޑިއާގެ ފަހަތުން ދެން އެންމެ ގިނަ އަދަދަކަށް ކޭސް ރެކޯޑް ކޮށްފައިވަނީ 407684 ކޭހާއެކު ބަންގްލަދޭޝްއިންނެވެ. ޕާކިސްތާނުން 332993 ކޭސް ރެކޯޑް ކޮށްފައި ވާއިރު، ނޭޕާލްއިން ވަނީ 170743 ކޭސް ރެކޯޑް ކޮށްފައެވެ.
ކޮވިޑް-19 ޖެހުނު މީހުންގެ ތެރެއިން ދުނިޔޭގެ އެކި ކަންކޮޅުތަކުން މިވަގުތު އެކްޓިވް ކޭހުގެ ގޮތުގައި 11537714 ކޭސް ފާހަގަ ކޮށްފައިވެއެވެ. މީގެ ތެރެއިން، 83594 ޕޭޝަންޓުންނަކީ ސީރިއަސް/ކުރިޓިކަލް ހާލުގައި އޮތް ޕޭޝަންޓުންނެވެ. މި ބަލި ޖެހިގެން މަރުވި މީހުންގެ އަދަދު 1196512 އަށް އަރާފައިވާއިރު، އެންމެ ގިނަ އަދަދަކަށް މަރުގެ ކޭސް ރެކޯޑް ކޮށްފައި ވަނީ އެމެރިކާ، ބްރެޒިލް އަދި އިންޑިއާއިންނެވެ. އިންޑިއާއާއި ބްރެޒިލްއިން 1 ލައްކައަކަށް ވުރެ ގިނަ މީހުން މަރުވެގެން ރެކޯޑް ކޮށްފައިވާއިރު، އެމެރިކާގެ މަރުގެ ކޭސް ނަމްބަރު ވަނީ 2 ލައްކައިގެ ފާހަގަ ހުރަސް ކޮށްފައެވެ.
ކޮވިޑް-19 އަށް އަދިވެސް ކަނޑައެޅިގެން ވަކި ފަރުވާއެއް ހޯދިފައި ވާ ކަން، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ކަށަވަރު ކޮށްދީފައެއް ނުވެއެވެ. އަދި މި ބަލިން ދިފާއުވުމަށް ދާއިމީ ވެކްސިނެއްވެސް ހޯދިފައެއް ނުވެއެވެ. ބަލި ޖެހޭ މީހުންނަށް ފަރުވާ ދެމުން ދަނީ، ޕޭޝަންޓުންގެ ހަށިގަނޑުން ފެންނަ އަލާމާތްތަކަށް ބަލައިގެންނެވެ.
