ފަރުވާއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19) ގެ ބަލިމަޑުކަމުގެ އެންމެ ނުރައްކާ މަންޒިލް ނުވަތަ އެޕިސެންޓާ އަކީ އަނެއްކާވެސް ވިލާތުބައްރު ކަމަށް، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ބުނެފިއެވެ.
ޑަބްލިއުއެޗްއޯގެ ވިލާތު ޑައިރެކްޓާ ޑރ ހާންސް ކްލޫގޭ ވިދާޅުވީ، ކޮވިޑް-19 ގެ ބަލިމަޑުކަން ފެށުނު ފަހުން އަދާ ހިސާބަށް އާދެވުނުއިރު ވިލާތުން 10 މިލިއަން ފާހަގަ ހުރަސް ކޮށްފައި ވާ ކަމަށެވެ. މީގެ ތެރެއިން، 1.5 މިލިއަން ކޭސް ރެކޯޑް ކުރީ މިދިޔަ ހަފުތާގައި ކަންވެސް އޭނާ ވަނީ ފާހަގަ ކުރައްވާފައެވެ.
ކޮވިޑް-19ގެ ބަލިމަޑުކަމުގެ އެޕިސެންޓާއަކަށް އަނެއްކާވެސް ވިލާތު ބައްރު ވެފައި ވާ ކަމަށް ޑރ ކްލޫގޭ ވިދާޅުވީ، ވިލާތުގެ ސިއްހަތާ ބެހޭ ވަޒީރުންގެ ބައްދަލުވުމެއްގައެވެ.
ވިލާތުގެ ހާލަތާ މެދު އިންޒާރު ކުރައްވަމުން ޑރ ކްލޫގޭ ވިދާޅުވީ، ބަލިޖެހިގެން ހޮސްޕިޓަލުގައި އެޑްމިޓްކޮށްގެން ފަރުވާ ދޭންޖެހޭ މީހުންގެ އަދަދު އިތުރު ވެފައިވަނީ، ބަހާރު މޫސުމަށްފަހު ފެނިފައި ނުވާ ފަދަ ދަރަޖައަކަށް ކަމަށެވެ. ފާއިތުވީ 2 ހަފުތާއެއްހާ ދުވަހަށް ބަލާއިރު، މިއަދަދު 7 މިލިއަނުން 9 މިލިއަނަށް އިތުރު ވެފައި ވާ ކަމަށާ، ހުސްވި ހަފުތާއަށް ބަލާއިރު ވިލާތުން މަރުވި މީހުންގެ އަދަދުވެސް 32 ޕަސެންޓް އިތުރު ވެފައި ވާ ކަމަށް ޑރ ކްލޫގޭ ވިދާޅުވިއެވެ.
ކޮވިޑް-19ގެ އިތުރު ރާޅަކާ ކުރިމަތިލާން ޖެހިފައި ވާއިރު، ވިލާތުގެ ގައުމުތަކުން ދަނީ ބަލިމަޑުކަން ކޮންޓްރޯލް ކުރުމަށް އާ ފިޔަވަޅުތަކެއް އަޅަމުންނެވެ. މިއަދުން ފަށައިގެން ފަރަންސޭސިވިލާތުގައި ގައުމީ ފެންވަރުގެ ލޮކްޑައުންއެއް ތަންފީޒު ކުރަން ފަށާއިރު، ޑރ ކްލޫގޭ ވަނީ، މިފަދަ ލޮކްޑައުންއަކަށް ދާންވީ އިތުރު އެހެން އެއްވެސް ގޮތެއް ނެތިގެން ކަމަށް ވިދާޅުވެފައެވެ.
2019 ވަނަ އަހަރުގެ ފަހުކޮޅު ޗައިނާއިން ކޮވިޑް-19ގެ ކޭސްތައް ރެކޯޑް ކުރަން ފެށިފަހުން، ކޮވިޑް-19ގެ އެންމެ ނުރައްކާ މަންޒިލެއްގެ ގޮތުގައި ވިލާތު ބައްރު އޮތީ މާޗް-އޭޕްރިލް ހިސާބުގައެވެ.
