އެހެން ސަރުކާރުތަކާ އަޅާބަލާއިރު، މި ސަރުކާރުން ޒުވާނުންނާ ގުޅުހުން ހުރި ދާއިރާތަކުން ގިނަ ކާމިޔާބީތަކެއް ހާސިލް ކޮށްފައިވާ ކަމަށް މިނިސްޓާ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވާމަންޓުން އަހްމަދު މަހްލޫފް ވިދާޅުވެއްޖެއެވެ.
"މޯލްޑިވްސް ޔޫތް ކޭމްޕް 2020" ފެށުމުގެ ގޮތުން ވާޗުއަލްކޮށް ބޭއްވި ރަސްމިއްޔާތުގައި މިނިސްޓަރު މަހްލޫފް ވިދާޅުވީ ވޭތުވެދިޔަ އަހަރުތަކާ އަޅާބަލާއިރު ރައީސް އިބްރާހިމް މުހައްމަދު ސޯލިހް ވެރިކަމާ ހަވާލުވެ، މިވީ މުއްދަތުގެ ތެރޭގައި ޒުވާނުންނާއި ގުޅުހުންހުރި ދާއިރާތަކުން ގިނަ ކަންތައްތަކެއް ކުރެވި ކާމިޔާބީތަކެއް ހާސިލުކުރެވިފައިވާކަމަށެވެ.
އެކި ވުޒާރާތަކާއި ގުޅިގެން ކުރި މަސައްކަތުން އެތައް ހާސް ޒުވާނުންނަށް ވަޒީފާގެ ފުރުސަތު ފަހިކޮށްދެވިފައި ވާކަމަށާއި އެގޮތުން ކުޅިވަރު ކުރިއެރުވުމަށްވެސް ގިނަ މަސައްކަތްތަކެއް ކުރެވިފައިވާކަމަށް މަހްލޫފް ވިދާޅުވިއެވެ.
ރާއްޖޭގައި ތިބި ހުރިހާ ޒުވާނުންނާއި ވަކި ވަކިން ބައްދަލު ނުކުރެވުނު ކަމުގައިވިޔަސް އެކި ދާއިރާތަކުން އައު ހިޔާލުތަކާއި، އައު ވިސްނުންތަކާއި އެކީގައި ކުރިއަށްދާން ބޭނުންވާ ޒުވާނުންނާއި ބައްދަލުވެފައިވާ ކަމަށާއި ހަމަ އެގޮތަށް ޒުވާނުންނަށް މިހާރުވެސް ލިބޭ އެހީތެރިކަން ކުރިއަށް އޮތް ތަނުގައިވެސް ލިބޭނެ ކަމުގެ ޔަގީންކަން މަހްލޫފް ދެއްވިއެވެ.
އަންހެނުންނާއި ފިރިހެނުންގެ ޖިންސީ ތަފާތުކުރުންތައް ނައްތާލައި ގައުމީ އެތްލީޓުންނަށްދޭ މުސާރައާ އިނާމު ފައިސާއަށް ރަނގަޅު ހެޔޮ ބަދަލުތަކެއް ސަރުކާރުން މިހާރު ގެނެސްފައިވާކަމަށާއި މަސްތުވާތަކެތީގެ ވަބާއިން ޒުވާނުން ސަލާމަތް ކުރުމާއި ފަންނުވެރި ޒުވާނުން އުފެއްދުމަށް މަސައްކަތްތަކާއި ތަމްރީނު ޕްރޮގްރާމްތަކެއް ހިންގިފައިވާކަމަށްވެސް މަހްލޫފް ވިދާޅުވިއެވެ.
އޮކްޓޫބަރު މަހުގެ 22 ވަނަ ދުވަހަކީ ޒުވާނުންގެ ދުވަސް ކަމަށް ވަޒީރުންގެ މަޖިލީހުން ފާސްކުރީ މިދިޔަ އަހަރުގެ ޑިސެމްބަރު މަހެވެ.
