މި ހިނގާ އޮކްޓޫބަރު މަހުގެ ފުރަތަމަ 15 ދުވަހު ރާއްޖެ އައި ފަތުރުވެރިންގެ އަދަދު 8000 އިން މައްޗަށް އަރައިފިއެވެ.
އިމިގްރޭޝަނުން ބުނީ ރާއްޖޭގެ ބޯޑަރު ހުޅުވިތާ ފުރަތަމަ ތިން މަސްދުވަސް ތެރޭ ޖުމްލަ 27،217 ފަތުރުވެރިން ރާއްޖެ އައިސްފައިވާ ކަމަށެވެ. އެގޮތުން މި މަހުގެ ތަފާސްހިސާބުތަކަށް ބަލާއިރު، މި މަހުގެ 1 ވަނަ ދުވަހުން 15 ވަނަ ދުވަހުގެ ނިޔަލަށް މިހާތަނަށް 8350 ފަތުރުވެރިން ރާއްޖެ އައިސްފައި ވެއެވެ.
މި މަހު ރާއްޖެ އައި ފަތުރުވެރިންގެ އަދަދަކީ ރާއްޖޭގެ ބޯޑަރު ހުޅުވާލި ދެވަނަ މަހާ އަޅާބަލާއިރު 56 ޕަސެންޓްގެ އިތުރުވުމެއް ކަމަށް އިމިގްރޭޝަނުން ބުނެއެވެ.
އެންމެ ގިނައިން މި މަހު އައިސްފައި ވަނީ ރަޝިޔާއިންނެވެ. އެއީ ޖުމްލަ 2308 ފަތުރުވެރިންނެވެ. ދެވަނަ އަށް އެންމެ ގިނަ ފަތުރުވެރިން މި މަހު އައިސްފައި ވަނީ އެމެރިކާއިންނެވެ. އެއީ ޖުމްލަ 666 ފަތުރުވެރިންނެވެ.
ކޮވިޑް-19 އަށް ފަހު ރާއްޖޭގެ ބޯޑަރު ހުޅުވާލި ފަހުން ރާއްޖެއަށް އަންނަ ފަތުރުވެރިންގެ އަދަދު އިތުރުވާން ފަށަފައިވާއިރު، ރިސޯޓުތައް ހުޅުވާލާފައި ވަނީ ޖުލައި މަހުގެ 15 ވަނަ ދުވަހެވެ.
މީގެ އިތުރުން ގެސްޓްހައުސްތައް ބަންދުކޮށްފައި ހުންނަތާ އެތަށް މަހަކަށްފަހު ގެސްޓްހައުސްތައް ހުޅުވީ މި މަހުގެ 15 ވަނަ ދުވަހެވެ. އެގޮތުން، 9 ރަށަކުން 16 ގެސްޓްހައުސްއެއް އެ ދުވަހު ވަނީ ހުޅުވާފައެވެ.
