ދިވެހި ސަރުކާރުން އިންޑިއާއިން ނަގާފައިވާ ލޯނުތައް ނަގާފައި ވަނީ ދެފުށް ފެންނަ ގޮތަކަށް ކަމުގައި ވާތީ އެއީ ދަރަނީގެ ދަނތުރައެެއް ނޫން ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ރޭ މަޖިލިސް އިދާރާގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން ރައީސް ނަޝީދު ވަނީ އިންޑިއާގެ ދަރަނި، ދަންތުރައަކަށް ނުވާ ސަބަބާއި ޗައިނާގެ ލޯނު ދަންތުރައަކަށް ވަނީ ކީއްވެގެން ކަމަށް ވިދާޅުވެދެއްވައިފައެވެ.
އެގޮތުން ރައީސް ނަޝީދު ވިދާޅުވީ "ދަރަނީގެ ދަންތުރަ" އަކަށް ވަނީ ނަގާ ދަރަންޏާއި އުފައްދާ ހަރުމުދަލާ އެއްވަރު ނުވުމުން ކަމަށާއި ނަގާ ދަރަނިން އެފައިސާ ދެއްކޭނެ އިގްތިސާދީ ހަރަކާތް ނުހިންގޭ ނަމަ އެއީ ދަރަނީގެ ދަންތުރައެއް ކަމަށެވެ.
އިންޑިއާ ލޯނާއި ޗައިނާ ލޯނުގައި ހުރި އެންމެ ބޮޑު އެއް ތަފާތަކީ އިންޑިއާގެ ލޯނުތައް ނަގާއިރު ދެފުށް ފެންނަ ގޮތަކަށް ޓެންޑަރުގެ މަސައްކަތް ކޮށްފައި ހުރުން ކަމަށެވެ.
ރައީސް ނަޝީދު އެ މޭރުމުން ވާހަކަ ދައްކަވާފައި ވާއިރު، ކުރީގެ ރައީސް ޔާމީންގެ ސަރުކާރުގައި ޗައިނާއިން ނަގާފައިވާ ލޯނުތަކުގެ ސަބަބުން ރާއްޖެ ދަރާފައި ވާކަމަށް ވިދާޅުވެ، ސަރުކާރު ހިންގާ މައި ޕާޓީ އެމްޑީޕީން ވަނީ ޗައިނާއަށް ފާޑު ކިޔާފައެވެ. އަދި ޗައިނާއިން ރާއްޖެއަށް ފޯރުކޮށް ދޭ ލޯނު އެހީ އަކީ ތަރައްގީއަށް ވެދޭ އެހީތެރިކަމެއްގެ ގޮތުގައި ދެކެވަޑައި ނުގަންނަވާ ކަމަށާ އޭގެ ބަދަލުގައި އެއީ ދަރަނީގެ ދަންތުރައެއް ކަމަށްވެސް ރައީސް ނަޝީދުވެސް ވަނީ ވިދާޅުވެފައެވެ.
އިންޑިއާއިން ވަނީ ރާއްޖެއަށް ޖުމްލަ 750 މިލިއަން ޑޮލަރުގެ މާލީ ޕެކޭޖެއް ލޯނުގެ ގޮތުގައި ދީފައެވެ. އޭގެ ތެރޭގައި މާލެ-ތިލަފުށި ބްރިޖު އަޅަން 500 މިލިއަން ޑޮލަރާއި، ކޮވިޑް-19 ގެ ސަބަބުން އިގުތިސޯދަށް ލިބުނު ގެއްލުން ތަކުން އަރައިގަތުމަށްޓަކައި ބަޖެޓް ސަޕޯޓުގެ ގޮތުގައި 250 މިލިއަން ޑޮލަރު ދިނުމާއި، ރާއްޖެއަށް ބޭނުންވާ ޒަރޫރީ ބާވަތްތަކުގެ ކޯޓާ އާކޮށްދިނުމުގެ އިތުރުން އިންޑިއާގެ ކްރެޑިޓް ލައިންގެ ތެރެއިން 7 މަޝްރޫއެއް ހިންގުމަށް ނިންމާފައިވާކަން އިންޑިއާ އިން ވަނީ ހާމަކޮށްފައެވެ.
