ކާމިޔާބު ވެކްސިނެއް ފުޅާ ދާއިރާއެއްގައި ބޭނުން ކުރަން ފެށުމުގެ ކުރިން، ކޮރޯނާވައިރަސް ޑިޒީޒް (ކޮވިޑް-19) ގެ ޝިކާރައަކަށްވެ، މި ދުނިޔެއާއި ވަކިވެދާ މީހުންގެ އަދަދު 2 މިލިއަނަށް އެރުން ގާތް ކަމަށް، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން އިންޒާރު ކޮށްފިއެވެ.
ކުއްލި ނުރައްކާތަކާ ބެހޭ ޑަބްލިއުއެޗްއޯގެ އިސްވެރިޔާ ޑރ މައިކް ރާޔަން ވިޑާޅުވީ، ބައިނަލްއަގުވާމީ ފެންވަރުގައި ފިޔަވަޅުތަކެއް ނާޅައިފިނަމަ މި ބަލީގައި މަރުވެދާ މީހުންގެ އަދަދު މިއަށްވުރެ ވެސް މައްޗަށް އެރުން އެކަށީގެން ވާ ކަމަށެވެ.
ކޮވިޑް-19ގައި 2 މިލިއަން މީހުން މަރުވެދާނެތޯ ދެންނެވުނު ސުވާލަށް ޖަވާބު ދެއްވަމުން ޑރ ރާޔަން ވިދާޅުވީ، އެއީވެސް ވުން އެކަށީގެންވާ ކަމެއް ކަމަށެވެ.
ކޮވިޑް-19ގައި މީހުން މަރުވާ ނިސްބަތް މިހާރު ކޮންމެވެސް ވަރަކަށް މަޑުޖެހެމުންދަނީ، ފަރުވާގެ ނިޒާމު ހަރުދަނާ ވަމުން އަންނާތީ ކަމަށްވެސް ޑރ ރާޔަން ވަނީ ފާހަގަކުރައްވާފައެވެ. ނަމަވެސް ބިނާކުރަނިވި ފަރުވާއާއި ކާމިޔާބު ވެކްސިންތަކާ އެކުގައިވެސް، 2 މިލިއަން މަރުގެ ކޭސް ހަމަ ނުވެ ނުދިއުން އެކަށީގެންވާކަމަށް ޑރ ރާޔަން ވިދާޅުވިއެވެ.
މިދިޔަ އަހަރުގެ ޑިސެމްބަރު މަހު ޗައިނާއިން ފުރަތަމަ ފަހަރަށް ރިޕޯޓް ކުރަން ފެށި ކޮވިޑް-19 ޖެހިގެން ދުނިޔޭގެ އެކި ކަންކޮޅުތަކުން މިހާތަނަށް މަރުވި މީހުންގެ އަދަދު މިހާރު ވަނީ ގާތްގަނޑަކަށް 1 މިލިއަނަށް އަރާފައެވެ. ބަލި ޖެހުނު މީހުންގެ ޖުމުލަ އަދަދު 32 މިލިއަނަށްވުރެ މައްޗަށް އަރާފައިވާކަމަށް ރެކޯޑްތަކުން ދައްކައެވެ.
