ފާއިތުވެދިޔަ 24 ގަޑިއިރަކީ، ކޮރޯނާވައިރަސް ޑިޒީޒް (ކޮވިޑް-19)ގެ ބަލިމަޑުކަން ފެށުނު ފަހުން ފާއިތުވި މަސްތަކަށް ބަލާއިރު އެންމެ ގިނަ އަދަދަކަށް ޕޮޒިޓިވް ކޭސް ރެކޯޑް ކުރި ދުވަސް ކަމަށް ތަފާސް ހިސާބުތަކުން ދައްކައިފިއެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ)ގެ ރެކޯޑްތަކަށް ބަލާއިރު، 24 ގަޑިއިރުގެ ތެރޭގައި 307930 ކޭސް ރެކޯޑް ކޮށްފައިވެއެވެ. މީގެ ކުރިން އެންމެ ގިނަ އަދަދަކަށް ކޭސް ރެކޯޑްކުރީ މި މަހުގެ 6 ވަނަ ދުވަހުއެވެ. އެ ދުވަހު ރެކޯޑް ކޮށްފައި ވަނީ 306857 ކޭހެވެ.
ލިބިފައިވާ އެންމެ ފަހުގެ މައުލޫމާތަށް ބަލާއިރު ދުނިޔޭގެ އެކި ކަންކޮޅުތަކުން މިހާތަނަށް ކޮވިޑް-19 ޖެހުނު މީހުންގެ އަދަދު ވަނީ 29181882 އަށް އަރާފައެވެ. މުޅި ދުނިޔޭގެ މަސްރަށް ބަލާއިރު މިލިއަނުން މަތިން، 4 ގައުމަކުން ކޭސް ރެކޯޑް ކޮށްފައިވެއެވެ.
- އެމެރިކާ: 6708458 ޖުމުލަ ކޭސް | 2534989 އެކްޓިވް ކޭސް
- އިންޑިއާ: 4845003 ޖުމުލަ ކޭސް | 988205 އެކްޓިވް ކޭސް
- ބްރެޒިލް: 4330455 ޖުމުލަ ކޭސް | 624834 އެކްޓިވް ކޭސް
- ރަޝިއާ: 1062811 ޖުމުލަ ކޭސް | 168008 އެކްޓިވް ކޭސް
އާދީއްތަ ދުވަހުގެ ރެކޯޑްތަކަށް ބަލާއިރު، މި ދުވަހުވެސް އެންމެ ގިނަ އަދަދަކަށް ކޭސް ރެކޯޑް ކޮށްފައިވަނީ އިންޑިއާއިންނެވެ. އިންޑިއާއިން އިއްޔެ ވަނީ 93215 ކޭސް ރެކޯޑް ކޮށްފައެވެ. ސެޕްޓެމްބަރު މަހުގެ މެދަކާ ހިސާބަށް އާދެވުނުއިރު އިންޑިއާއިން ވަނީ، މިމަހު އެކަނިވެސް މިލިއަނަކަށްވުރެ ގިނަ ޕޮޒިޓިވް ކޭސް ރެކޯޑް ކޮށްފައެވެ. އިންޑިއާގައި މިވަގުތު އެކްޓިވް ކޭހުގެ ގޮތުގައި 988205 ކޭހެއް ވަނީ ރެކޯޑް ކޮށްފައެވެ.
ޗައިނާގެ ވޫހާން ސިޓީގައި ގަވައިދާ ހިލާފަށް އޮޕަރޭޓްކުރަމުންދިޔަ ސީފުޑް މާކެޓް ސަރަހައްދަކުން، 2019 ވަނަ އަހަރުގެ ފަހުކޮޅު، ކޮވިޑް-19ގެ ކޭސްތައް އެންމެ ފުރަތަމަ ރިޕޯޓްކުރަން ފެށި ފަހުން މިއަދާ ހިސާބަށް އައިއިރު، މި ބަލީގައި 928267 މީހެއްގެ ފުރާނަ ވަނީ ގެއްލިފައެވެ. ރެކޯޑްތަކަށް ބަލާއިރު، މި ބަލިމަޑުކަމުގައި އެންމެ ގިނަ ބަޔަކު މަރުވެ ގޮސްފައިވަނީ، އެމެރިކާ (198520)، ބްރެޒިލް (131663) އަދި އިންޑިއާ (79524) އިންނެވެ.
މި ބަލިމަޑުކަމުގައި އުޅޭތާ އަހަރެއްހާ ދުވަސް ފާއިތުވެގެންދާއިރު، އަދިވެސް ވަނީ ކަނޑައެޅިގެން ވަކި ފަރުވާއެއް ނުހޯދިފައެވެ. މި ބަލި ޖެހޭ މީހުންގެ ތެރެއިން ހާލު ދެރަވެ، ސީރިއަސް/ކުރިޓިކަލް ވަނީ 1 ޕަސެންޓް މީހުން ކަމަށް ތަފާސް ހިސާބުތަކުން ދައްކައެވެ. ދުނިޔޭގެ އެކި ކަންކޮޅުތަކުގައި މިވަގުތު އެކްޓިވް ކޭހުގެ ގޮތުގައި ރެކޯޑް ކޮށްފައިވާ 7.2 މިލިއަން ކޭހަށް ބަލާއިރު، ސީރިއަސް/ކުރިޓިކަލް ހާލުގައި އޮތް ކަމަށް ރެކޯޑް ކޮށްފައިވަނީ 60467 ޕޭޝަންޓެކެވެ.
ކޮވިޑް-19 ޖެހުނު މީހުންގެ ތެރެއިން، މިހާތަނަށް 21026790 މީހަކަށް ޝިފާ ލިބި، ބަލިން ރަނގަޅުވެފައިވާކަމަށް ރެކޯޑްތަކުން ދައްކައެވެ. ކޮވިޑް-19 ޖެހި، ބަލިން ރަނގަޅުވުމަކީ ދެވަނަ ފަހަރަށް ބަލި ނުޖެހޭނެ ކަމަށް ލިބޭ ޔަގީން ކަމެއްވެސް ނޫނެވެ.
