މުސްތަގުބަލުގައި ކުރިމަތިލާންޖެހިދާނެ އާ ބަލިމަޑުކަމަކަށް މުޅި ދުނިޔެ ތައްޔާރުވާންޖެހޭ ކަމަށް، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) ގެ އިސްވެރިޔާ، ޑރ ޓެޑްރޯޒް އެޑަނޮމް ގެބްރިޔޭސޫސް ވިދާޅުވެއްޖެއެވެ.
ދެން ކުރިމަތިލާންޖެހޭ ބަލިމަޑުކަމެއްގައި މިހާރަށްވުރެ ފުރިހަމައަށް ކަންކަމަށް ރިއާޔަތް ކުރުމަށް މަސައްކަތްތައް ފެށުމަށް ގޮވާލައްވަމުން ޑރ ޓެޑްރޯޒް ވަނީ، އާންމު ސިއްހަތުގެ ދާއިރާގައި އިންވެސްޓް ކުރުމަށް ގައުމުތަކަށް ގޮވާލައްވާފައެވެ.
ސިވިއާ އެކިއުޓް ރެސްޕިރޭޓަރީ ސިންޑްރޯމް ކޮރޯނާވައިރަސް 2 (ސާސްކޯވް-2) އިން ޖައްސާ، ކޮރޯނާވައިރަސް ޑިޒީޒް (ކޮވިޑް-19) ގެ ކޭސްތައް، ޗައިނާގެ ވޫހާން ސިޓީއިން، 2019 ވަނަ އަހަރުގެ ޑިސެމްބަރު މަހުގެ ފަހުކޮޅު ރިޕޯޓް ކުރަން ފެށި ފަހުން އަދާ ހަމައަށް އައި އިރު، ދުނިޔޭގެ އެކި ކަންކޮޅުތަކުން، 200 އަށްވުރެ ގިނަ މަންޒިލުން، 27.485 މިލިއަން މީހުން ވަނީ މި ބައްޔަށް ޕޮޒިޓިވްވެފައެވެ. އަދި މި ބަލީގައި މަރުވެދިޔަ މީހުންގެ އަދަދު މިހާރު ވަނީ 896842 އަށް އަރާފައެވެ.
ސްވިޓްޒަލަންޑްގެ ޖެނީވާގައި ކުރިއަށް ދިޔަ ނޫސްވެރިންގެ ބައްދަލުވުމެއްގައި ޑރ ޓެޑްރޯޒް ވިދާޅުވީ، ބަލިމަޑުމަކީ ދިރިއުޅުމުގައި ކުރިމަތިލާންޖެހޭ ކަމެއްކަން މާޒީގެ ފިލާވަޅުތައް އުނގަންނައިދޭ ކަމަށާ، ނަމަވެސް ދެން އަންނަ ބަލިމަޑުކަމަކާ ކުރިމަތިލާއިރު، މިހާރަށްވުރެ ބޮޑަށް، ދުނިޔެ ތައްޔާރުވާން ޖެހޭ ކަމަށެވެ.
ހަލުވިކަމާއެކު ފެތުރެމުންދާ ކޮވިޑް-19 އިން ދިފާއުވުމަށް ވެކްސިނެއް ތަރައްގީ ކުރުމުގެ މަސައްކަތްވެސް އިންތިހާ ހަލުވި ދުވެލީގައި ދަނީ ކުރިއަށެވެ. ނަމަވެސް، އަންނަ އަހަރުގެ މެދަކާ ހިސާބަށް ދެވުމުގެ ކުރިން، އާންމުންނާ ހިސާބަށް ވެކްސިނެއް އައިސްދާނެ ކަމުގެ އުއްމީދެއް ނެތް ކަމަށް، ޑަބްލިއުއެޗްއޯގެ ތަރުޖަމާނަކު ވަނީ ހާމަކުރައްވާފައެވެ.
