ކުރީގެ ރައީސް އަބްދުﷲ ޔާމީން މަނީ ލޯންޑާ ކުރި މައްސަލާގައި ކްރިމިނަލް ކޯޓުން އެމަނިކުފާނުގެ މައްޗަށް އިއްވާފައިވާ ހުކުމް އިސްތިއުނާފު ކުރުމަށް ހުށަހަޅާ، އެ މައްސަލައިގެ 6 ވަނަ ޝަރީއަތް ހައިކޯޓުގައި މާދަމައަށް ތާވަލުކޮށްފިއެވެ.

ހައިކޯޓުން ބުނީ، އިސްތިއުނާފީ ޝަރީއަތް ތާވަލުކޮށްފައި ވަނީ މާދަމާ މެންދުރު 1:00 އަށް ކަމަށެވެ. މި މައްސަލައިގެ އަޑުއެހުމެއް މިމަހު 5 ވަނަ ދުވަހަށް ތާވަލުކުރިއެވެ. ނަމަވެސް، އެމަނިކުފާނުގެ ވަކީލުންނާ އެކަހެރިކޮށް ބައްދަލުކުރެވޭނެ އިންތިޒާމް ހަމަޖައްސައިދީފައި ނުވާތީ، އެ ޝަރީއަތް ކުރިއަށް ގެންދެވޭ ގޮތް ވަނީ ނުވެފައެވެ.

އަދި އެ ދުވަހުގެ ޝަރީއަތް ކެންސަލް ކުރުމަށް އެދުނު އަނެއް ސަބަބަކީ މާލޭގައި ކޮވިޑް-19ގެ ހާލަތު އޮތް ގޮތުން ކަމަށް ރައީސް ޔާމީންގެ ވަކީލުން ވަނީ އޭރު ވިދާޅުވެފައެވެ. ވަކީލުންގެ ޓީމުގައި ހިމެނިވަޑައިގަންނަވާ އާދަމް ޝަމީމް ވިދާޅުވީ، މިހާ ބާރަށް ކޮވިޑް-19 ފެތުރެމުން ދާއިރު ރައީސް ޔާމީން މާލެ ގެނައުމަކީ އެންމެ ރައްކާތެރިގޮތް ކަމުގައި ނުފެންނަ ކަމަށެވެ.

މާދަމައަށް ރައީސް ޔާމީންގެ ޝަރީއަތް ތާވަލުކޮށްފައިވާއިރު، މާލޭގައި ކޮވިޑްގެ ހާލަތު ވަކި ރަނގަޅެއް ނުވެއެވެ. ނަމަވެސް، ރައީސް ޔާމީނާ، އެމަނިކުފާނުގެ ވަކީލުންނާ އެކަހެރިކޮސް ބައްދަލު ކުރެވޭނެ އިންތިޒާމް ވަނީ ހަމަޖެހިފައެވެ. 5 މަސް ދުވަހަށް ފަހު ވަކީލުންނާ ބައްދަލުކުރެއްވުމުގެ ފުރުސަތު އެމަނިކުފާނަސް ލިބިވަޑައިގެންފައި ވަނީ މިމަހު 24 ވަނަ ދުވަހެވެ.

ރައީސް ޔާމީންގެ ޖުމްލަ 3 މައްސަލައެއް މިހާރު ކޯޓުގައި ކުރިއަށް އެބަގެންދެއެވެ. އެގޮތުން، ގއ. ވޮޑަމުއްލާ ކުއްޔަށް ދޫކުރުމުގައި މަނީ ލޯންޑާ ކުރި ކަމުގެ ކުށް އެމަނިކުފާނުގެ މައްޗަށް ސާބިތުވެފައިވާއިރު، މި މައްސަލައިގެ އިސްތިއުނާފު މިހާރު ހައި ކޯޓުގައި ކުރިއަށް އެބަގެންދެއެވެ.

އަދި ރ. ފުއްގިރި ކުއްޔަށް ދޫކުރުމުގެ މުއާމަލާތާ ގުޅިގެން މަނީ ލޯންޑަރިންގެ ކުށުގެ ދައުވާއާއި، ރިޝްވަތު ގަބޫލު ކުރުމުގެ ދައުވާ ކްރިމިނަލް ކޯޓުގައި ކުރިއަށް ގެންދިއުމަށް ވަނީ ނިންމާފައެވެ.

ހަބަރު ހައި ކޯޓް އަބްދުﷲ ޔާމީން ސިޔާސީ