ރާއްޖެއިން ކޮވިޑް-19 އަށް ޕޮޒިޓިވް ވެ، ރަނގަޅުވި މީހުންގެ ތެރޭގައި ތެލަސީމިއާ ދެ މީހަކު ހިމެނޭ ކަމަށް ޑރ. އަހްމަދު އުމަރު ވިދާޅުވެއްޖެއެވެ.
މޯލްޑިވްސް ބްލަޑް ސާވިސްގެ އެސޯސިއޭޓް ސްޕެޝަލިސްޓް އިން ޕީޑިއެޓްރިކް ޑރ. އަހްމަދު އުމަރު މިހެން ވިދާޅުވީ، ޕީއެސްއެމް ނިއުސް އިން ގެނެސްދޭ ކޮވިޑް-19 ކަވަރޭޖަށް ދެއްވި އިންޓަވިއުއެއްގައެވެ. އެގޮތުން، އުމަރު ވިދާޅުވީ، މިހާތަނަށް ލިބިފައިވާ މައުލޫމާތުތަކުން އެނގޭ ގޮތުގައި ކޮވިޑަށް ޕޮޒިޓިވްވީ ތެލަސީމިއާ ބަލި މީހުންގެ ތެރެއިން ދެ ބަލި މީހުން ކަމަށެވެ.
އަދި އެމީހުން ޕޮޒިޓިވްކަން ދެނެގަނެވިފައި ވަނީ ކޮންޓެކްޓް ޓްރޭސިންގެ ތެރެއިން ކަމަށެވެ. އެމީހުން ޕޮޒިޓިވްވެ، ބަލިން ރަނގަޅުވި އިރުވެސް ބަލީގެ އެއްވެސް އަލާމާތެއް ފެނިފައި ނުވާ ކަމަށް އުމަރު މައުލޫމާތު ދެއްވިއެވެ. އަދި އިތުރު އެއްވެސް މައްސަލައެއް ދިމާވެފައި ނުވާ ކަމަށް އޭނާ ވިދާޅުވިއެވެ.
ތެލަސީމިއާ ބަލި މީހުންނަކީ ކޮވިޑް-19 ރިސްކް ގްރޫޕުގެ ތެރޭގައި ހިމެނޭ ބައެކެވެ.
ޕީއެސްއެމްގައި ވާހަކަ ދައްކަވަމުން އުމަރު ވިދާޅުވީ، ޕޮޒިޓިވްވި ފަރާތަކާ ކޮންޓެކްޓްވެ، ނުވަތަ އަލާމާތްތައް ހުރުމުގެ ސަބަބުން ތެލަސީމިއާ ބަލި މީހަކު ކޮވިޑަށް ޓެސްޓު ކުރަން ޖެހިއްޖެ ހާލަތެއްގައި އެކަމުގައި ތެލަސީމިއާ ސެންޓަރުން އެހީތެރިކަން ފޯރުކޮށްދޭނެ ކަމަށެވެ. އަދި އެފަދަ މީހުން، އެ ސެންޓަރަށް އަންގާ ދިނުމަށް ވެސް އުމަރު ވަނީ އެދިލައްވާފައެވެ.
މިހާތަނަށް މި ބައްޔަށް ޕޮޒިޓިވްވި 6370 މީހުންގެ ތެރެއިން 3915 މީހުން ރަނގަޅުވެފައިވާއިރު، 25 މީހަކު ވަނީ ނިޔާވެފައެވެ. އަދި މިހާރު އެކްޓިވް ކޭސްތަކުގެ ތެރޭގައި ހިމެނެނީ 2431 މީހެކެވެ. އޭގެ ތެރެއިން 161 މީހަކު ހޮސްޕިޓަލުގައި ވާއިރު، 1355 މީހަކު ވަނީ އައިސޮލޭޝަން ފެސިލިޓީތަކުގައެވެ.
މި ބައްޔަށް ފަރުވަ ކުރަމުންދާ ނުވަތަ އެކްޓިވް ކޭސްތައް އުޅެނީ މާލެ ސަރަހައްދުގެ އިތުރުން، ރާއްޖޭގެ 21 ރަށެއްގައެވެ. އަދި 10 ރިސޯޓެއްގައި ވެސް އެކްޓިވް ކޭސްތައް އުޅޭއިރު، 2 ފަތުރުވެރިންނާއި 13 ރިސޯޓް މުވައްޒަފުން ވަނީ ޕޮޒިޓިވްވެފައެވެ.
