ތ. ވިލުފުށިން 2 އަހަރުގެ ކުޑަކުއްޖަކު ކޮވިޑަށް ޕޮޒިޓިވް ވެއްޖެއެވެ.
ހެލްތު އެމްޖެންސީ އޮޕަރޭޝަން ސެންޓާ (އެޗްއީއޯސީ) އިން ބުނީ، މާލެއިން ރަށަށް ގޮސް ފުރަބަންދުގައި ތިބި މީހުން ދޫކުރުމުގެ ކުރިން ހެދި ޓެސްޓުން ތ. ވިލުފުށީ ކަރަންޓީނުގައި ހުރި ކުޑަކުއްޖަކު ކޮވިޑަށް ޕޮޒިޓިވް ވެފައިވާ ކަމަށެވެ. އެ ގޮތުން ޕޮޒިޓިވް ވެފައި ވަނީ އުމުރުން 2 އަހަރުގެ އަންހެން ކުއްޖެއް ކަމަށް އެޗްއީއޯސީން ބުނެއެވެ.
ފުރަބަންދުގައި ތިބި މީހުން ދޫކުރުމަށް ހަދާ ކޮވިޑް ޓެސްޓުން މިދިޔަ ހޮނިހިރު ދުވަހު ވަނީ ކުޑަ 2 ކުއްޖެއް ކޮވިޑަށް ޕޮޒިޓިވް ވެފައެވެ. އެއީ އދ. މާމިގިލިން އުމުރުން 6 އަހަރުގެ އަންހެން ކުއްޖަކާއި ފ. ނިލަންދޫއިން އުމުރުން 4 އަހަަރުގެ ފިރިހެން ކުއްޖެކެވެ.
ރާއްޖެއިން މިހާރު ޕޮޒިޓިވްވި މީހުންގެ ޖުމްލަ އަދަދު މިވަނީ 5909 އަށް އަރާފައެވެ. އަދި ރަނގަޅުވި މީހުންގެ އަދަދު 3488 އަށް ވަނީ އަރާފައެވެ. އިއްޔެ ޕޮޒިޓިވްވި މީހުންގެ ތެރެއިން 118 މީހަކު މާލެ ސަރަހައްދުން ޕޮޒިޓިވް ވެފައިވާއިރު، 6 މީހަކު ޕޮޒިޓިވްވީ އަތޮޅުތެރެއިންނެވެ.
މިހާރު މިބަލި ޖެހިފައިވާ 2389 މީހުން އުޅޭއިރު، އެމީހުންގެ ތެރެއިން 138 މީހަކަށް ހޮސްޕިޓަލުގައި ދަނީ ފަރުވާ ދެމުންނެވެ. އަދި 1478 މީހަކު އައިސޮލޭޝަން ފެސިލިޓީތަކުގައި އެބަތިއްބެވެ.
