ކުރީ ސަރުކާރުން ބޯހިޔާވަހިކަމަށް ހަދަން ފެށި ހިޔާ ފްލެޓް މަޝްރޫއުގެ ދަށުން އަޅާފައިވާ 7000 ފުލެޓްގެ ފިނިޝިން މަސައްކަތް ނިންމުމަކާ ނުލައި ރައްޔިތުންނަށް ހަވާލުކުރަން ނިންމާފައިވަނީ ކޮން ސަރުކާރަކުން ކަމާ މެދު ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު އާއި މިހާރުގެ ހައުސިން މިނިސްޓަރު މުހައްމަދު އަސްލަމާ ހޫނު ބަހުސެއް ކުރައްވައިފިއެވެ.
ހުޅުމާލެ ދެވަނަ ފިޔަވަހީގައި އިމްރާތް ކޮށްފައިވާ 25 ބުރީގެ ފްލެޓްތަކާ ގުޅޭ މައުލޫމާތު ހޯދަން ގައުމީ ތަރައްގީ އާއި ތަރިކައާ ބެހޭ ރައްޔިތުންގެ މަޖިލީހުގެ ކޮމިޓީ އަށް އަސްލަމާއި މުއިއްޒު ހާޒިރުކޮށް މެންބަރުން ވަނީ ސުވާލު ކުރައްވާފައެވެ.
މާކެޓް ރޭޓަށް ވުރެ އަގުބޮޑުކޮށް ހުޅުމާލޭގައި އިމާރާތްކުރާ 7،000 ފްލެޓުގެ ފިނިޝިން ނުނިންމައި ހަވާލުކުރަން ކަނޑައެޅީ، މި ސަރުކާރުން ކަމަށް ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވި ވާހަކަ މިހާރުގެ މިނިސްޓަރު މުހައްމަދު އަސްލަމް ކޮމިޓީގައި ދޮގު ކުރައްވައި ފްލެޓްތަކުގެ އަގާ ގުޅޭ ގޮތުން ހޫނު ބަހުސެއް ކުރައްވައިފި އެވެ.
ހުޅުމާލޭގެ ދެވަނަ ފިޔަވަހީގައި އިމާރާތްކުރާ ފްލެޓްތަކާ ގުޅޭ މައުލޫމާތު ހޯދަން ގައުމީ ތަރައްގީ އާއި ތަރިކައާ ބެހޭ ރައްޔިތުންގެ މަޖިލީހުގެ ކޮމިޓީ އަށް އަސްލަމާއި މުއިއްޒު ހާޒިރުކުރުމުން ގިނަ މެމްބަރުން ސުވާލު ކުރެއްވީ އަގު ބޮޑުކޮށް، އެ މަޝްރޫއު ކުރިއަށް ގެންދިޔަ ސަބަބާ ގުޅޭ ގޮތުންނެވެ. އެގޮތުން ހޯރަފުށީ ދާއިރާގެ އެމްޑީޕީގެ މެމްބަރު އަހްމަދު ސަލީމް ވަނީ ފްލެޓްތަކުގެ ދޮރު ހަރުނުކޮށް ކުލަ ނުލައި ބޮކި ހަރުނުކޮށް ތަށިމުށި ނުޖަހައި ދޭން ނިންމީ ކީއްވެތޯ އެއްސަވާފައެވެ.
ސަލީމް ކުރެއްވި ސުވާލަށް ޖަވާބު ދެއްވަމުން މުއިއްޒު ވިދާޅުވީ، ކުރީގެ ރައީސް އަބްދުﷲ ޔާމީންގެ ސަރުކާރުން އެ މަޝްރޫއު ކުރިއަށް ގެންދަން ނިންމާފައި ވަނީ ފިނިޝިން ނިންމައި ރައްޔިތުންނާ ހަވާލުކުރާ ގޮތަށް ކަމަށެވެ. އަދި އެކަން ބަދަލުކުރީ މި ސަރުކާރުން ކަމަށާއި އެ އަގުގައި ފިނިޝިން ނުނިންމައި ހަވާލުކުރުމަކީ ހައްގު މިންވަރު ނޫން ކަމަށް މުއިއްޒު ވިދާޅުވިއެވެ. ފިނިޝިން ނުނިންމާ ފްލެޓްތައް ރައްޔިތުންނަށް ހަވާލުކުރަން ނިންމުމަކީ މި ސަރުކާރުން ރައްޔިތުންނަށް ދިން ދެރައެއް ކަމަށް ވެސް މުއިއްޒު ވިދާޅުވިއެވެ.
މުއިއްޒު މިހެން ވިދާޅުވުމާ އެކު، ސަލީމް ވަނީ ކުރީ ސަރުކާރުން ފްލެޓްތައް ފިނިޝިން ނުނިންމާ ރައްޔިތުންނަށް ދޭން ނިންމާފައިވާ ކަމުގެ ހެއްކެއް ދައްކަވާފައެވެ. އެގޮތުން ފްލެޓްކުގެ ފިނިޝިން ނުނިންމައި ހަވާލުކުރާ ގޮތަށް ނިންމާފައިވާ ކަމަށް ޗައިނާގެ ސްޓޭޓުން ރައީސް އޮފީހަށް ކުރީ ސަރުކާރުގައި ފޮނުވާފައި އޮތް ސިޓީއެއް ސަލީމް ދެއްކެވިއެވެ. އެކަމާ ގުޅިގެން މުއިއްޒު ވިދާޅުވީ، އެފަދަ އެންމެ ސިޓީއެއް ދައްކަވާ އިރު އެފަދަ އެތައް ސިޓީއަކުން އެ މަޝްރޫއުގެ މުއާމަލާތުތައް ހިނގާފައިވާނެ ކަމަށެވެ.
ނަމަވެސް މުއިއްޒު ދެއްކެވި ވާހަކަތައް މިނިސްޓަރު އަސްލަމް ވަނީ ދޮގު ކުރައްވާފައެވެ. އަސްލަމް ވިދާޅުވީ، އެންމެ ކުރިން ވެސް 62،000 ޑޮލަރަށް ފްލެޓެއްގެ ރޭޓުން މަސައްކަތް ޗައިނާގެ ސްޓޭޓާ ހަވާލުކުރީ ފިނިޝިން ނުނިންމައި ހަވާލުކުރާ ގޮތަށް ކަމަށެވެ. އެއީ މި ސަރުކާރުން ގެނައި ބަދަލެއް ނޫން ކަމަށް ތަކުރާރުކޮށް އަސްލަމް ވިދާޅުވިއެވެ.
މީގެ އިތުރުން ފްލެޓް ދޫކުރަން ނިންމާފައިވާ އަގާ ގުޅޭ ގޮތުން މުއިއްޒު ވިދާޅުވީ، ދެ ކޮޓަރީގެ އެ ފްލެޓްތައް 5،600 ރުފިޔާއަށް ދޫކުރެވޭނެ ކަމަށާއި އޭގެ އިތުރުން ކުރީގެ ސަރުކާރުން ނަގަން ނިންމާފައިވާ އިތުރު 1000 ރުފިޔާ އަކީ މެއިޓެނަންސްގެ ފީ ކަމަށެވެ.
ނަމަވެސް އަސްލަމް ވިދާޅުވީ، މަޝްރޫއުގެ އަގުތައް އެ އޮތީ އެޗްޑީސީން އާއްމުކޮށްފައި ކަމަށާއި އެ ހިސާބު ހެދުމަކީ ރޮކެޓް ސައިންސެއް ނޫން ކަމަށެވެ. ހިޔާ މަޝްރޫއު ކުރިއަށް ގެންދަން ގިނަ ކުންފުނިތަކަކުން ޝައުގުވެރިކަން ފާޅުކޮށް، ފްލެޓެއް 52،000 ޑޮލަރަށް އަޅަން ކުންފުނިތަކެއް ހުށަހަޅާފައި ވަނިކޮށް، ޗައިނާ ސްޓޭޓާ ހަވާލުކުރީ އަގުބޮޑުކޮށް ފްލެޓަކަށް 62،000 ޑޮލަރަށް ކަމަށް އަސްލަމް ފާހަގަ ކުރެއްވިއެވެ. އަދި ފްލެޓްތަކުގެ އަގަށް ބަލާއިރު، ކޮންމެ ޔުނިޓަކަށް 956،040 ރުފިޔާ ޖެހޭ ކަމަށާއި އެއީ ބޮޑު ރޭޓަކަށް ވާއިރު ފިނިޝިން ނުނިންމައި ހަވާލުކުރާ ގޮތަށް ޗައިނާގެ ސްޓޭޓާއެކު އެއްބަސްވެފައި އޮތުމަކީ ކަންބޮޑުވުމެއް ކަމަށް އަސްލަމް ވިދާޅުވިއެވެ.
ތޮއްޖެހިފައިވާ މާލޭގެ ބޯހިޔާވަހި ކަމަށް ހައްލެއް ހޯދައި ދިނުމުގެ ގޮތުން ފެށި 7000 ފްލެޓްގެ މަަޝްރޫއަކީ 2016 ވަނަ އަހަރުގެ ޖުލައި މަހުގެ 20 ވަނަ ދުވަހު ސޮއިކޮށް 2017 ވަނަ އަހަރުގެ ޑިސެމްބަރު މަހުގެ 19 ވަނަ ދުވަހު އަމަލީ މަސައްކަތް ފެށި މަޝްރޫއެކެވެ. ހުޅުމާލޭގެ ދެ ވަނަ ފިޔަވަހީގައި، ޗައިނާ ސްޓޭޓް އިންޖިނިއަރިން އެންޑް ކޮންސްޓްރަކްޝަން ކޮމްޕެނީ (ސީއެސްއީސީ)އާ ހަވާލުކޮށްގެން އެ މަޝްރޫއު ފެށީ ކުރީގެ ރައީސް އަބްދުﷲ ޔާމީންގެ ވެރިކަމުގައެވެ.
ހިޔާ ފްލެޓް ތަކުގެ ސައިޒުގައި 550 އަކަފޫޓު ހުންނަ އިރު، އެ ފްލެޓްތައް ރައްޔިތުންނަށް ދޫކުރުމަށް ރައީސް ޔާމީންގެ ސަރުކާރުން ހަމަޖެއްސީ 6600 ރުފިޔާ އަށެވެ. އެއީ ކުއްޔަށް 5600 ރުފިޔާ އާއި މެއިންޓަނަންސް ފީއަށް 1000 ރުފިޔާ ނަގާ ގޮތަށެވެ. ނަމަވެސް އެޗްޑީސީން މި ފަހުން ބުނެފައި ވަނީ، އެ މަޝްރޫއުގެ އަގުތައް ހަދާފައި ހުރީ އެޕާޓުމަންޓް ތަކުގެ ފިނިޝިން ޗާޖު ނުލައި ކަމަށާއި، މިހާރު ހުރިހާ ހަރަދުތަކެއް ހިމަނައިގެން އެ ކޮންޓްރެކްޓް ނިމޭއިރު ޔުނިޓަކަށް ގާތްގަނޑަކަށް 1.2 މިލިއަން ރުފިޔާ އަރާ ކަމަށެވެ.
ފިނިޝިން މަސައްކަތް ނިންމާފައި ފްލެޓްތައް ހަވާލުކުރާ ނަމަ ދެވޭނެ އަގަކީ 11،000 ރުފިޔާ ކަމަށް ވީ ނަމަވެސް އެ އަގު 7500 ރުފިޔާއަށް ކުޑަ ކުރާނެ ކަމަށް މި ސަރުކާރުން ބުނެއެވެ. ނަމަވެސް ފަހުން މި ސަރުކާރުން ފްލެޓްތައް ދޫކުރާނީ ފިނިޝިން މަސައްކަތް ނުނިންމާ ކަމަށެވެ.
މިހާރު ހީވާކަހަލަ ކޮވިޑް 19 އާއި ގުޅިގެން އެނަމުގައި ޤައުމަށް ފައިސާވަންނާނެ ގޮތެއް ނެތިތިއްބައި ފޮރިންމިނިސްޓަރ ނިއްމެވި ވޯރޑްޓުއަރ އަށާއި ކޮވިޑް 19އިގެ ޙާލަތާގުޅުވާ އެކިއެކި ކަންކަމުގެ ނަމުގައި ދައުލަތުގެ އޮތޯރިޓީތަކުން ނާޗަރަންގީ ކުޅެން ޚަރަދުކުރުމުގެ ސަބަބުން ފައިސާ ނެތިގެން ދައްކާ ބަހަނާ ތަކަކަށް. އެހެންތާވާނީ އެޖެންޑާ 19އިގެ ސަބަބުން ޤައުމުވަނީ އިންޑިއާއަށް ދަރައި ހުލިވެފައި. ފަހަރެއްގައި ވެދާނެ އުނިއިތުރު ކޮށްލެވޭ ކަހަލަ ކަރުދާހަކުން އަސްލުކަރުދާހާއެކު ބައިންޑް ކޮށްލީމާ މިހާރުގެ މިނިސްޓަރ ބޭނުންވާގޮތަށް ޑޮކިއުމަންޓްތައް ބަދަލުވަމުން ދަނީ ކަމަށްވެސް. ތިކަމަށް ރައްދު ދެއްވާނީ ދެން ޗައިނާސަރުކާރުން ރާއްޖެއަށް ކަނޑައަޅާފައި ހުންނަވާ ސަފީރު. ވަރަށް ސަލާމް