ގައުމުގެ ތަސައްވަރު ކިލަނބު ކުރަނީ ކޮންފަރާތަކުންކަން ރައްޔިތުންނަށް ސާފުކޮށް އެނގޭ ކަމަށް މާވަށު ދާއިރާގެ މެންބަރު މުހައްމަދު ސައީދު ވިދާޅުވެއްޖެއެވެ.
ސައީދު ވިދާޅުވީ ގައުމުތަކާއި ރާއްޖެއާ ދެމެދު އުފެދިފައިވާ ޒަމާންވީ ގުޅުމުގެ ތެރެއަށް ވަދެ ސިޔާސަތުތަކާއި ދިވެހިން ފަހުރުވެރިވާ އެންމެހައި ސިފަތަކާއި ގައުމުގެ ތަސައްވަރު ކިލަނބު ކުރަނީ ކޮންފަރާތަކުން ކަން ރައްޔިތުންނަށް ސާފުކޮށް އެނގޭ ކަމަށާއި އެކަން ހާރިޖީ ވަބާއަކަށް ވެފައި ކަމަށެވެ.
ސައީދު މިފަދައިން ވިދާޅުވެފައި ވަނީ އިންޑިއާ ސަރުކާރުން އައުޓްޑޯ ޖިމް ވަސީލަތްތައް ހަދިޔާ ކުުރުމަށް ގަލޮޅު ދަނޑުގައި އިއްޔެ ބޭއްވި ރަސްމިއްޔާތުގައި ވާހަކަ ދައްކަވަމުން، އިންޑިއާއާ ޖަދަލުކޮށްފިނަމަ، ދިވެހީންނަށް އުޖާލާ މަންޒަރެއް ނުފެންނާނެ ކަމަށް ރައްޔިތުންގެ މަޖިލިސް ރައީސް، ރައީސް މުހައްމަދު ނަޝީދު ވިދާޅުވުމާ ގުޅިގެންނެވެ.
އިއްޔެގެ އެ ރަސްމިއްޔާތުގައި އިިންޑިއާއަށް ވަރަށް ބޮޑަށް ތައުރީފު ކުރައްވާ ރައީސް ނަޝީދު ވިދާޅުވީ ދިވެހީން ދެކޭ އުއްމީދާއި ތަނަވަސް ދިރިއުޅުން އިންޑިއާ މެދުވެރިކޮށް ހޯދޭނެ ކަމަށާއި އެކަންކަން ހާސިލު ކުރުމަށްޓަކައި ރަނގަޅު ގޮތް ހޯދުމަށް ވިސްނުން ބަދަލު ކުރަން ޖެހޭ ކަމަށެވެ.
މި ސަރުކާރުން އިންޑިއާ އާއި ގާތް ގުޅުމެއް ބާއްވަމުން ދާއިރު، ކުރީގެ ސަރުކާރުން އެ ގުޅުން ގާއިމް ކޮށްފައި ވަނީ ޗައިނާއާ އެކުއެވެ. ސިޔާސީ ގިނަ ފަރާތްތަކުން ދަނީ ދެ ގައުމުގެ ގުޅުމާ މެދު ވާހަކަ ދައްކަމުންނެވެ.
